یەکێتی: پڕۆژەکەی گۆڕان بۆ حکومەت دەبێتە پڕۆژەی هەمو لایەنەکان

کۆبونەوەی سەرکردایەتی هاوبەشی بزوتنەوەی گۆڕان و یەکێتی نیشتیمانی کوردستان کۆتایی هات و بەرپرسێکی یەکێتیش دەڵێت: پڕۆژەکەی گۆڕان دەبێتە پڕۆژەی هەمو لایەنەکان.

دوانیوەڕۆی ئەمڕۆ چوارشەممە، کۆبونەوەی سەرکردایەتی هاوبەشی بزوتنەوەی گۆڕان و یەکێتی نیشتیمانی کوردستان لە مەکۆی سەرەکی بزوتنەوەی گۆڕان لە شاری سلێمانی بەڕێوەچو، دوابەدوای کۆبونەوەکە، عیماد ئەحمەد ئەندامی سەرکردایەتی هاوبەش لە یەکێتی نیشتیمانی کوردستان، رایگەیاند؛ پڕۆژەکەی بزوتنەوەی گۆڕان بۆ حکومەت، دەبێتە پڕۆژەی هەمو لایەنەکان.

وتیشی :”کۆبونەوەی سەکردایەتی هاوبەش بەردەوام دەبێت، بۆ گفتوگۆکردن لەسەر ئەم دۆخەی دروست بوە لەپێناو دۆزینەوەی رێگاچارەسەری گونجاو بۆ کێشەکان”.

سەبارەت بە پەیوەندی نێوان یەکێتی نیشتیمانی کوردستان و بزوتنەوەی گۆڕان، عیماد ئەحمەد رایگەیاند: سەرکردایەتی هاوبەشمان هەیە و پەیوەندی بەردەواممان هەیە، بەهۆی ئەو دۆخەی کوردستانی تێکەوتوە، لە هەمو کات زیاتر پێویستە کۆک بین و یەکڕیزبین، بەتایبەتی یەکێتی و گۆڕان پێویستیان بە کۆبونەوە هەڵوێستی هاوبەش هەیە.

لای خۆیەوە د.ئیسماعیل نامیق، ئەندامی سەرکردایەتی هاوبەش لە بزوتنەوەی گۆڕان رایگەیاند؛ پڕۆژەکەی ئێمە سێ خاڵی گرنگی تێدایە، ئەوانیش یەکەم پێکهێنانی حکومەتی کاتی و دوەم ئامادەکاری و پاککردنەوەی تۆماری دەنگدەران بۆ هەڵبژاردن و سێیەم ئەم حکومەتە کاتییە وەفدێکی دانوستانکاری باش پێکبهێنێت بۆ ئەوەی گفتوگۆ لەگەڵ بەغدا و بکات و ئەو مافانە بەدەست بهێنین کە لە دەستوردا هەیە.

ئاماژەی بەوەکرد، پڕۆژەکەی گۆڕان لە روانگەی هەستکردن بە بەرپرسیارێتی نیشتیمانییەوە ئامادەکراوە و هیچ دەستکەوتێکی حیزبی و ماددی تێدا نیە و لەپێناو کوردستان و پاراستنی ئەو قەوارە سیاسی و دەستورییەی هەرێمدا ئامادەکراوە، هەربۆیە وەڵامدانەوەی لایەنەکان بۆ پڕۆژەکەی گۆڕان ئیجابییە و بڕیاریشە لە چەند رۆژی داهاتودا یەکێتی سەبارەت بە پڕۆژەکە وەڵامی بزوتنەوەی گۆڕان بداتەوە.

23/11/2017
زیاتر...
هیچ بابەتێک به‌رده‌ست نیه‌ .