گۆڕان و قۆناغی نوێی كاری سیاسی

كاتێك بزوتنه‌وه‌ی گۆڕان به‌شداری له‌ حكومه‌تدا كرد، مۆدێلێكی جیاوازی له‌حكومداری و به‌شداریكردن داهێنا، كه‌ به‌شداریكردنی نه‌بوه‌ هۆی ساردكردنه‌وه‌ی له‌سه‌ر به‌رنامه‌ و به‌ڵینه‌كانی وه‌ك هه‌ندێك گره‌ویان له‌سه‌ر كردبو و پێیانوابو به‌پێدانی چه‌ند پۆستێك‌ و راكیشانی بۆ ناو حكومه‌ت‌، بێ ده‌نگ ده‌بێ ‌و ده‌یكه‌نه‌ پاشكۆی خۆیان‌، به‌پێچه‌وانه‌وه‌ گۆڕان حكومه‌ت و په‌رله‌مانی كرده‌ سه‌نگه‌ری به‌رگركردن له‌داواكانی هاوڵاتیان، هه‌ر له‌م پێناوه‌شدا بڕیاریدا بكشێته‌وه‌ و ده‌ستبكاته‌وه‌ به‌ خه‌باتی مه‌ده‌نی.

قه‌یرانه‌ زۆره‌كان، نه‌بونی خزمه‌تگوزاری، ناره‌زایی و خۆپیشاندانه‌كانی خه‌ڵكی كوردستان، بێ موچه‌یی و ناعه‌داله‌تی و پاشه‌كشه‌ی دیموكراسی و ملنه‌دان بۆ گۆڕینی سیستمی حوكمڕانی نیشانه‌ی شكستی حكومه‌تی هه‌رێمی كوردستانن.

بزوتنه‌وه‌ی گۆڕان له‌ هه‌ڵبژاردنی (٢٠١٣)دا به‌ڵێنی به‌ ده‌نگده‌رانیدا له‌پێناو گۆڕینی ریشه‌یی سیستمی سیاسی و كاراكردنیی رۆڵی په‌رله‌مان به‌شداری ده‌سه‌ڵات بكات.

له‌و رێگه‌یه‌شه‌وه‌ باشكردنی گوزه‌رانی هاوڵاتیان و چاكسازی و به‌دامه‌زراوه‌كردنی حكومه‌ت و شه‌ڕی گه‌نده‌ڵی و پاراستنیی هه‌رێمی كوردستان له‌ هه‌مو جۆره‌ مه‌ترسیه‌كی سیاسیی، ئابوری، سه‌ربازی.

گۆڕان سه‌ره‌ڕای ئه‌وه‌ی ده‌یزانی حكومه‌ت و دامه‌زراوه‌كانیی به‌ هۆی ده‌ستوه‌ردانی حیزبییه‌وه‌ نقومی گه‌نده‌ڵیی و داخوران بوه‌، به‌ڵام له‌ پێناوی ئه‌وه‌ی بتوانێ ئه‌وه‌ی ماوه‌ رزگاریبكات زۆربه‌ جدییه‌وه‌ به‌شداری له‌ كابینه‌ی هه‌شتدا كرد، كه‌وا بڕیاربو ببێته‌ حكومه‌تی هاوڵاتی و شه‌راكه‌تی راسته‌قینه‌ له‌ ده‌سه‌ڵات و به‌یه‌كه‌وه‌ كاركردن له‌پێناو بنیادنانی ده‌سه‌ڵاتێكی دیموكراسی به‌رپرس و كۆتایهێنان به‌ قۆرغكاری حیزبی.

هه‌ر له‌سه‌ره‌تاوه‌ زۆرهه‌وڵدرا گۆڕان له‌ ئامانجه‌ نیشتیمانه‌كانی دوربخرێته‌وه‌، پارتی له‌ رێكه‌وتن و به‌ڵێنه‌كانی پاشگه‌زبوه‌وه‌ و ئاماده‌نه‌بو چاكسازی بكات و شه‌راكه‌تی له‌ ده‌سه‌ڵات ره‌تكرده‌وه‌ و هه‌مو جومگه‌ گرنگه‌كانی ده‌سه‌ڵاتی قۆرخكرد، له‌وه‌ش زیاتر ده‌یویست هێز و لایه‌نه‌كانی تریش بكاته‌ پاشكۆی خۆی و هیچ لایه‌ك ره‌خنه‌ و پڕۆژه‌ی نه‌بێت، ده‌یویست په‌رله‌مان چاودێری ‌و به‌دواداچون بۆ‌ كاره‌كانی‌ حكومه‌ت نه‌كات و ببێته‌ دامه‌زراوه‌یه‌كی بێ ناوه‌ڕۆك.

ئه‌وكات پڕۆژه‌ی گۆڕان بۆ چاكسازی له‌وه‌زاره‌تی پێشمه‌رگه‌ له‌لایه‌ن سه‌رۆكی هه‌رێمه‌وه‌ ره‌تكرایه‌وه‌ و رَگربون له‌وه‌ی پێشمه‌رگه‌ بكرێته‌ هێزێكی نیشتیمانی، هه‌روه‌ك پشتگوێخستنی چاكسازی و شه‌فاف نه‌كردنی نه‌وت و داهات و به‌رده‌ومیدان به‌ سیاسه‌تی شكستخواردوی سه‌ربه‌خۆی ئابوری، كه‌ بزوتنه‌وه‌ی گۆڕان زۆر هه‌وڵیدا سیاسه‌تی نه‌وت بگۆڕدرێت و پێداچونه‌وه‌ به‌ په‌یوه‌ندییه‌كان له‌گه‌ڵ حكومه‌تی فیدڕاڵ بكرێت، به‌ڵام هه‌موی به‌ بیانوی جیاواز ره‌تكرانه‌وه‌ و سه‌رئه‌نجام هه‌رێمیان به‌م دۆخه‌ گه‌یاند.

كاتێك ماوه‌ی یاسایی سه‌رۆكی هه‌رێم كۆتاییهات و پارتی ده‌یویست به‌نایاسایی و وه‌ك پێشو دو ساڵی تری بۆ درێژبكرێته‌وه‌، دۆخه‌كه‌ به‌ بنبه‌ست گه‌یشت، به‌ڵام گۆڕان ئه‌وه‌ی ره‌تكرده‌وه‌ و به‌هاوكاری لایه‌ناكانی تر پڕۆژه‌یان بۆ هه‌مواری یاسای سه‌رۆكایه‌تی هه‌رێم و گۆڕینی سیستمه‌كه‌ بۆ په‌رله‌مانی ئاماده‌كرد. پارتی كه‌ته‌نیا كه‌وتبو ئه‌وه‌ی پێ هه‌زم نه‌كراو به‌ بڕیاری مه‌كته‌بی سیاسی له‌ (١٢)ی ئۆكتوبه‌ری (٢٠١٥) كوده‌تای به‌سه‌ر په‌رله‌مان كرد و به‌هێز رێگری له‌گه‌ڕانه‌وه‌ی سه‌رۆكی په‌رله‌مان كرد و وه‌زیره‌كانی گۆڕانی دورخسته‌وه‌.

له‌دوای ئه‌و روداوه‌، هه‌رچه‌نده‌ گۆڕان له‌حكومه‌ت نه‌مابو، به‌ڵام بڕیاری ئۆپۆزسێۆن بونی نه‌دا، چونكه‌ هه‌رێم له‌شه‌ڕی داعشدابو وه‌ك ئه‌ركێكی نیشتیمانیی باڵا نه‌یویست سه‌نگه‌ره‌كانی به‌رگری به‌ناكۆكی سیاسی بارگاوی بن، گۆڕان به‌رپرسانه‌ مامه‌ڵه‌ی له‌گه‌ڵ ئه‌و واقعه‌دا كرد و میدیا و تواناكانی خستبوه‌ خزمه‌ت پێشمه‌رگه‌وه‌.

له‌گه‌ڵ ئه‌مه‌ش، گۆڕان سوربو له‌سه‌ر ئه‌وه‌ی به‌ ئیراده‌ی خۆی بڕیاری ئۆپۆزسێۆن بون ده‌دات، نه‌ك هێزێك له‌رێی كوده‌تاوه‌ ناچاری بكات، سه‌رئه‌نجام گۆڕان له‌ شه‌ڕی ئیراده‌دا سه‌ركه‌وت و ملی بۆ فشاری كوده‌تاچییه‌كان نه‌دا و سازشی له‌ پرنسیپه‌كانی نه‌كرد.

له‌ دوای ریفراندۆمه‌وه‌، گۆڕان بۆ ده‌ربازبون له‌ دۆخی قه‌یراناوی هه‌رێم پڕۆژه‌یه‌كی نیشتیمانی بۆ پێكهێنانی حكومه‌تی كاتی پێشكه‌شكرد، كه‌ده‌بوه‌ هۆی چاره‌سه‌ركردنی قه‌یرانی موچه‌ و به‌شی زۆری كێشه‌كانی تری هه‌رێم، به‌ڵام له‌لایه‌ن پارتی و حكومه‌ته‌ شكستخواردوه‌كه‌ی ره‌تكرانه‌وه‌ و جارێكی تر به‌رژه‌وه‌ندییه‌ شه‌خسی و حیزبییه‌كانیان به‌سه‌ر برژه‌وه‌ندییه‌كانی نیشتمانییه‌كاندا زاڵكرد.

بۆیه‌ گۆڕان به‌ نه‌فه‌سێكی دیكه‌ی سیاسی بڕیاری ئۆپۆزسیۆن بونی له‌به‌رامبه‌ر ئه‌م ده‌سه‌ڵاته‌دا، گۆڕان ئه‌و ماوه‌یه‌ی له‌ حكومه‌تدا بو، تا ئه‌و كاته‌ی رێگری لێكرا به‌رپرسیارێتی هه‌ڵده‌رگرێ و سه‌ره‌ڕای به‌ربه‌سته‌كانیش چه‌ندی ده‌رفه‌تی بۆ ره‌خسابێت ئه‌ركی گه‌وره‌ی به‌ جێگه‌یاند.

وه‌ك چۆن له‌ خولی پێشوی په‌رله‌ماندا، ئۆپۆزسیۆن بونی گۆڕان مۆدیلێكی جیاوازی له‌ حیزبایه‌تی‌ و ژیانی سیاسییدا هێنایه‌ ئاراوه‌، ئاواش به‌ به‌شداریكردنی له‌ حكومه‌ت مۆدێلێكی جیاوازی له‌حكومداری و به‌شداریكردن داهێنا. كه‌ به‌شداریكردنی نه‌بوه‌ هۆی ساردكردنه‌وه‌ی له‌سه‌ر به‌رنامه‌ و به‌ڵینه‌كانی وه‌ك هه‌ندێك گره‌ویان له‌سه‌ر كردبو و پێیانوابو به‌پێدانی چه‌ند پۆستێك‌ و راكیشانی بۆ ناو حكومه‌ت‌، بێ ده‌نگ ده‌بێ ‌و ده‌یكه‌نه‌ پاشكۆی خۆیان‌، به‌پێچه‌وانه‌وه‌ گۆڕان حكومه‌ت و په‌رله‌مانی كرده‌ سه‌نگه‌ری به‌رگركردن له‌داواكانی هاوڵاتیان.

29/12/2017
زیاتر...
هیچ بابەتێک به‌رده‌ست نیه‌ .