قادر حاجی عەلی: سەرکەوتنی ئەمجارە دەکەینە دیاری بۆ رۆحی نەوشیروان مستەفا
سەرۆکی لیژنەی باڵای هەڵبژاردنەکانی گۆڕان، رایگەیاند: هەڵبژاردنی ئەمجارە وەک هەڵبژاردنی (25)ی تەمموز بۆ گۆڕان گرنگە و دڵنیایان بە ئیرادەی شەقام و گۆڕانخوازان سەردەکەوین و سەرکەوتنەکەش دەکەینە دیاری و چەپگە گۆڵ بۆ رۆحی رەوانشاد نەوشیروان مستەفا.

قادر حاجی عەلی، سەرۆکی لیژنەی باڵای هەڵبژاردنەکانی بزوتنەوەی گۆڕان، لە کۆبونەوەیەکی جەماوەرییدا لەگەڵ هەڵسوڕاوانی بزوتنەوەی گۆڕان لە قەزای رانیە،  بەرنامەی ئەمجارەی هەڵبژاردنی بزوتنەوەکە خستەڕو بۆ بەشداریی کردن لە هەڵبژاردنی ئەنجومەنی نوێنەرانی عێراق.

رایگەیاند: لە دۆخێکدا پرۆسەی هەڵبژاردن بەڕێوەدەچێت، کە دەسەڵاتداران سەرزەمین و ژێرزەمینی ئەم وڵاتەیان فرۆشتوە، لەبەرامبەردا گەنجان و خەڵکی ئەم وڵاتە گیرفانیان بەتاڵە و رۆژانە بەبەرچاویانەوە سەدان تانکەر نەوت دەنێریتە دەرەوە، موچە بوە بە روبعە موچە، ئەگەر حکومەتی عێراق یارمەتی نەدایە ئەم مانگە ئەوە چارەکە موچەیەش نابو دابەشی بکەن.
ئاماژەی بەوەکرد؛ بزوتنەوەی گۆڕان هەر لەسەرەتای دروستبونییەوە بوە هۆی چاوکردنەوەی خەڵک و بوە هۆی ئەوەی قۆرخکاریی  دەسەڵات نەمێنێت و رێگریی بکەین لەوەی ئەم وڵاتە بەرەو میرنشین و دیکتاتۆری بچێت، گۆڕان خەڵکی ئازا کرد بۆ بەرگریی کردن لە مافەکانی.

 

دروشمی ئەمجارەی گۆڕان بۆ هەڵبژاردن: گۆڕان ئیرادەیەکی بەردەوامە

قادر حاجی عەلی رایگەیاند: ئەوانەی لە شاخەوە هاتنە شار، پشتیان کردە ئەو خەباتە، بۆیە پێمانوایە کە چیتر ئەوان شایستەی ئەوەنین وڵات بەڕێەوەبەرن، چونکە لەبەری خۆشگوزەرانی و ژیانی ئاسودە بۆ خەڵک، بونەتە مایەی گەندەڵی و ناڕەحەتی و برسیکردنی خەڵ.

سەرۆکی لیژنەی هەڵبژاردنەکان ئاشکرای کرد؛ دروشمی ئەمجارەی گۆڕان بۆ هەڵبژاردن ئەوەیە کە "گۆڕان ئیرادەیەکی بەردەوامە".

بەوتەی قادر حاجی عەلی، تائێستا بزوتنەوەی بەشداریی ژمارەیەک هەڵبژاردنی کردوە، هەڵبژاردنی (25)ی حەوتی (2009) چارەنوسساز بو، چونکە خەڵکانێک هەبو پێیاندەوتین گۆڕان تەنها کەفوکوڵێکی کاتییە بەسەر دەچێت، بەڵام گۆڕان بوە هۆی چەسپاندنی ئەو ریشەی چاکسازییەی کە هەمو خەڵک لە بیرو بۆچنی خۆیدا هەبو، گۆڕان ئەو ریشەیەی خستەسەر کاغەز و میدیا، بۆ ئەوەش لەسەردەمی رەوانشاد کاک نەوشیرواندا خەباتی زۆری بۆ کرا و بە پشتیوانی خەڵک و شەقام توانرا، (25%)ی هەمو کورسییەکانی پەرلەمانی کوردستان بەدەستبهێنین، ئەوەش یەکەمجار بو لە وڵاتانی رۆژهەڵاتی ناوەڕاستدا دیاردەیەکی وا روبدات،  چونکە لە وڵاتەکانی رۆژهەڵاتی ناوەڕاست ئەوەندە زوڵم و زرۆ و زۆرداریی و زمانی چەک زۆرە، زۆر زەحمەت بو دوای چەند مانگێک لە دامەزراندنی گۆڕان (25%)ی کورسییەکانی پەرلەمان بەدەستبهێنێت.

 

هەڵبژاردنی ئەمجارە بەقەد هەڵبژاردنی (25/7) گرنگە

قادر حاجی عەلی ئاماژەی بەوەکرد؛ هەڵبژاردنی ئەمجارەش بەراورد بە یەکەم بەشداریی گۆڕان لە پرۆسەکەدا گرنگی زیاتر، ئەوەی یەکەمجار بۆ جێگە قایم کردن بو، بەڵام هەڵبژاردنی ئەمجارە بۆ داکوتنی ریشەیە، ئێستا نەوەیەکی تازەی گۆڕان سەرپەرشتی دەکات، کە پێویستە شتێک بەجێبهێڵیت بۆ دوای خۆی، دەبێت ریشەکە قوڵتر بکەین و پێگەی گۆڕان بەهێزتر بکەین.

وتیشی :"گرنگی ئەم هەڵبژاردنە لەوەدایە لەبەردەم تاقیکردنەوەیەکی گەورەداین، یەکەم هەڵبژاردنە کە رەوانشاد نەوشیروان مستەفا بەجەستە لەناوماندا نییە، دەبێت بیسەلمێنین کە هەڵگرانی رێبازی کاک نەوشیروان توانیویانە درێژەپێدەری بەرنامەکانی بن، چونکە نەوشیروان مستەفا تەنها بە لاشە لامان نییە و بەردەوام لە هزر و میشکی هەریەکێکماندایە، رێباز و روحی کاک نەوشیروان لەسەر مێشک و هزرمان دەسوڕێتەوە، ئەو ئاگای لە بزوتنەوەکەی و دۆخی کوردستانە، چونکە لەناوەی (50) ساڵی رابردودا بەرنامەی داناوە و جێبەجێکراوە.

 

رۆژی (19)ی مانگ کە ساڵیادی ماڵئاوایی کاک نەوشیروانە دەرەنجامەکان دەکەینە دیاریی بۆ روحی پاکی

 

قادر حاجی عەلی ئاماژەی بەوەکرد؛ پێویستە لە هەڵبژاردنەکەی (12)ی ئایار پێگەی خۆمان لەسەر زەوی بچەسپێنیت، لەم هەڵبژاردنەدا بەچەند سەعاتێک دوای کۆتاییهاتنی دەنگدان دەرەنجامەکانی رادەگەیەنرێت، ئێمەش ئەنجامی ئەو سەرکەوتنە وەردەگرین و رۆژی (19)ی مانگ کە ساڵیادی ماڵئاوایی کاک نەوشیروانە دەرەنجامەکان دەکەینە دیاریی بۆ روحی رەوانشاد نەوشیروان مستەفا و پێیدەڵێین ئەمە دیاری هزر و خەباتی تۆیە و بەردەوامی خەباتی تۆیە و هەڵگرانی رێبازەکەت بەردەوامن لە سەرکەوتن و درێژەپێدانی.

ئەو هەڵسوڕاوانی گۆڕان لە رانیەوە ئاشکرای کرد کە؛ خۆیان راپرسییان کردوە و راپرسی لایەن و وڵاتانی دیکەشیان بینیوە، لەهەمویدا دۆخی ئێمە زۆر زۆر باشە، بۆیە حەزدەکەین باوەڕتان بەخۆتان هەبێت، چونکە ئەو بەرنامە و کاندیدانەی دانراون زیاتر لە 30 رۆژ پێوەی خەریک بوین، بۆچی؟ چونکە ئێمە حیزبی جیاوازین، لە پارتەکانی تر لە سەرەوە بۆ خوارەوە لیست و کاندید دێتە خوارەوە، لەسەر بنەمای بەرژەوەندی بنەماڵەیی و حیزبی و کەسی، بەڵام ئێمە نەماندەزانی کێ هەڵبژێرین هەمو ئەو کەسانەی سیڤیان ناردبو کەسانی دڵسوز و زیرەک و قوربانیدەر بون لە پێناو گۆڕان، بۆیە ئەستەم بو لەنێوان ئەو خەڵکە، باشەکان هەڵژبژێرین، ئەوانەشی کە لیستەکەدا دەرنەچون، کەسانی زۆر زیرەک و شارەزا و لێهاتو و دڵسۆز و باش بون بەڵام ئەوەندە بوار هەبو.

 

لیستی کاندیدەکانی گۆڕان لەهەمو لیستەکان بەهێزترە

وتیشی :"ئەو کەسانە لەسەر رێبازی کاک نەوشیروان دانراون، دڵنیاتان دەکەینەوە کەدوای دانانی لیستەکەمان کاردانەوەکانمان وەرگرت و رەنگدانەوەی خەڵک زۆر باش و هەڵسەنگاندنیان ئەوەبو کە لە هەمو لیستەکانی دیکە بەهێزترین، بۆیە دەبێت بۆ ئەم هەڵبژاردنە دە ئەوەندەی جارانی پێشو تواناکانمان بخەینەگەڕ و بەرنامەکەمان بەخەڵک بناسێنین".

ئاماژەی بەوەکرد؛ تەمەنی بزوتنەوەی گۆڕان تەنها نۆ ساڵە، لەو ماوەیەدا بەشداریی ژمارەیەک هەڵبژاردنی کردوە لە حکومەت و پەرلەماندا بەشدار بوە، ئەو کارانەی لەو ماوەیەدا کردویەتی دەستکەوتی گەورەن، لەگەڵئەوەشدا رەنگە هەڵەو کەموکوڕیی هەبوبێت ئێمە حاشای لێناکەین، بزوتنەوەی گۆڕان هەر لە سەرتای دامەزراندنیەوە لەسەر یەک پرۆگرام و مەنهەج رۆیشتوە، یەک هەڵەی ستراتیژی نەکردوە، دڵنیاتان دەکمەوە کە هەڵەمان نییە ئەگەر خیانەتمان بکردایە، گەندەڵیمان بکردایە، ئەوا دەنگمان دلێر نابو.

 

بەدانپێدانانی دۆست و دوژمن، فراکسیۆنی گۆڕان لەبەغدا چالاکترین فراکسیۆنە

سەبارەت بە پەرلەمانتارانی بزوتنەوەی گۆڕان لە پەرلەمانی عێراق، قادر حاجی رایگەیاند: نوێنەرانی ئێمە لە پەرلەمانی عێراق تەنها نۆ کەس بون، یەکێکیان بوە جێگری سەرۆکی پەرلەمانی عێراق، بە دانپێدانانی دۆست و دوژمن، چالاکترین فراکسیۆنمان هەبوە، بەقەدەر (90) کەس کاریان کردوە لێرەوە رێزیان دەرگرین ستایشیان دەکەین، هیوادارین ئەمجارە ژمارەکە زۆر زیاتربێت و دڵنیاین زۆر زیاتر دەبێت، چونکە ئێمە بەردەوامین و بەردەوام دەبین.

وتیشی :"ئەم لیژنەی هەڵبژاردنەی کەدانراوە لە بزوتنەوەی گۆڕان، بڕیاری یەکەمی ئەوەبوە کە هەمو شتێک لەپێناو هەڵبژاردنە، کەواتە هەرچی کێشەیەکی بچوک هەیە بیخەینە لاوەوە روحی کاک نەشیروان ئاسودە بکەین".

قادر حاجی عەلی، ئەوەیخستەڕو کە دوای دەستلەکارکێشانەوەی رەوانشاد نەوشیروان مستەفا بڕیاری دامەزراندنی سەنتەرێکی توێژینەوە و رۆشنبیری دا، هەر ئەوکات پێیوتین کە بەنیازی شتی گەورەیە، بۆیە بڕیارماندا خۆمان کۆبکەینەوە و بەڵێنماندا ئەوەی پێویست بکات دەیکەین، لە پشتی هەمو بەرپرسیارێتیەکییەوە بین و هەوڵ و هەڵپەی بەرپرسیاریی نەدەین، نە لە حیزب و نە لە حکومەتدا، بڕیارەکە ئەوەبو کە پاڵپشتی گەنجەکان بین و پێشیان بکەویت، بەشانازییەوە ئیستا کۆمەڵێک گەنجمان دروست کردەوە کەس نییە شان لە شانیان بدات لە ئازایەتی و دڵسۆزی و زیرەکی، ئەوەش ئەوپەڕی مایەی شانازییە بۆ رۆحی نەوشیروان مستەفا و هاوڕێکانی.

ئێمە پشتمان بەهێزە و هزرمان رونە و رێگامان رۆشنە 

ئاماژەی بەوەشکرد؛ ئەو هەمو کردارە و رەفتار و نوسین و چاوپێکەوتنەی کاک نەوشیروان بۆی بەجێهێشتوین، لەهەرشتێک پەکمان کەوت بۆی دەگەڕێینەوە، بۆیە ئێمە پشتمان بەهێزە و هزرمان رونە و رێگامان رۆشنە و دڵنیاین لەوەی لەم هەڵبژاردنە لەوە زیاتر دەهێنین کە خەڵک پێشبینی دەکات.

بەوتی قادر حاجی عەلی، هەر دوای نەخۆشکەوتنی رەوانشاد نەوشیروان مستەفا، خەڵکێک هەبو چاوی بڕیبوە بزوتنەوەی گۆڕان، دوای وەفاتی کاک نەوشیروان ئەو کەسانە چاویان زەقتر بوەوە و چاویان بڕیبوە ئەوەی گۆڕان لەتبێت و هەرکەسە و بەشی خۆی بەرێت، بەڵام خۆشبەختانە مانگێک پاش چلەی کاک نەوشیروان، کۆبونەوەمان کرد و پەیڕەوی ناوخۆی گۆڕانمان کردە بنەما و رێکخەری گشتیمان هەڵبژارد و خانەی راپەڕاندنمان هەڵبژارد و بەسەربەرزیی لێی دەرچوین و بەڵێنی درێژەپێدانی رێبازی کاک نەوشیروان و بزوتنەوەی گۆڕانمان دوپاتکردەوە.

حیزبەکانی دەسەڵات لەڕێگەی شاگردەکانیانەوە دەنگۆی خراپ بڵاودەکەنەوە

سەرۆکی لیژنەی هەڵبژاردنەکان، ئاماژەی بەوەکرد کە بۆ ساردنەوەی خەڵک لە بەشداریی کردن لە دەنگدان حیزبەکانی دەسەڵات لەڕێگەی شاگرد و دەستوپێوەندەکانیانەوە دەنگۆ بڵاودەکەنەوە، یان دەڵێن پێنج حیزبە سەرەکییەکە وەکیەکن، من ئەوە دەخەمە بەر ویژدانی هەمو کەسێک، ئێمە و کۆمەڵ و تاڕادەیەک یەکگرتو جیاوازی ئاسمان و رێسمانمان هەیە لەگەڵ دو حیزبەکە، یان با باسی خۆمان بکەین وەک گۆڕان لەماوەی رابردودا لە حکومەت و پەرلەمان و حکومەتی خۆجێیی بەرگریمان لەسەر بەرژوەندی خەڵک کردوە و بەردەوام شەڕی دەکەین، نەک بەرژوەندەی خۆمان، بۆیە ئێمە شەقام و خەڵکمان هەیە و دڵنیاین سەردەکەوین و دەیبەینەوە.

 

ئێمە و کۆمەڵ و تاڕادەیەک یەکگرتویش جیاوازی ئاسمان و رێسمانمان هەیە لەگەڵ دو حیزبەکە

داوای لە دەنگدەرانی بزوتنەوەی گۆڕان و خەڵک کردەوە کە سار نەبنەوە لە بەشداریی کردنی هەڵبژاردنەکان، کۆمسیۆن دڵنیایان کردوینەتەوە کە ئەمجارە رێژەی تەزویر و ساختەکاریی زۆر کەمە و ئەوەش کاریگەریی ناکاتە سەر هەڵبژاردنەکان، ئەگەر بەراوردی هەڵبژاردنەکانی پێشو بکەین لە هەڵبژاردنی ئەنجومەنی پارێزگای سلێمانی دەنگی (15.4) کورسیمان هەبو، دوای ناردنی فۆرمەکان بۆ بەغدا هەمویان گۆڕی بە یارمەتی لایەن و وڵاتی دەرەکی دەستکارییان کرد، دەنگ و کورسیەکانی ئێمەیان کرد بە (12) و یەکێتیان کردە (11) کورسی، ئەمجارە ئەوە نەماوە، تەنها بۆ کۆمسیۆنی هەڵبژاردنەکانی بەغدا (600) ملیۆن دۆلار خەرجکراوە بۆ ئەوەی بە سندوقی زیرەک و ئەلیکترۆنی رێکبخرێت بۆیە ئەمجارە بواری ساختەکاریی و دەستکاریی دەنگەکان نەماوە، چونکە چیتر ناتوانن هاوکێشەی سیاسی و جوگرافی و دەنگەکان بگۆڕن، تکایە باش لە خەڵک بگەیەنن، هەمو دەنگێک موشەڕەفە و کاریگەریی هەیە.

12/04/2018
زیاتر...
هیچ بابەتێک به‌رده‌ست نیه‌ .