د. یوسف محەمەد: ئێمە بوین وتمان بەسیەتی تاڵانی و مانەوە لە دەسەڵات بە نایاسایی
د. یوسف محەمەد سادق، لە یەکەم رۆژى بانگەشەى هەڵبژاردندا رایدەگەیەنێت؛ ئەم دەسەڵاتە ستەمکارەی هەرێم، پێویستی بە هێزیک هەبو نەبێتە شەریکە تاڵانی لەگەڵیدا و بەرەنگاری ببێتەوە، گەرمایی هەناوی ئێوە بگەیەنێتە کۆشک و تەلارەکانیان، ئەوە ئێمە بوین ئەوەمان کرد، بێ ئەوەی بهێڵین شەڕ دروست بێتەوە، پێمان وتن راوەستن؛ حوکمڕانی ئاوا ناکرێت، بەسیەتی تاڵانی، بەسییەتی مانەوە لە دەسەڵات بە نایاسایی.

د. یوسف محەمەد سادق، سەرۆکى لیستى بزوتنەوەى گۆڕان لە سلێمانى لە پەیامى دەستپێکى بانگەشەى هەڵبژاردن کە لە شارى هەولێرەوە خوێندیەوە رایگەیاند؛ هاونیشتیمانیانی ئازیز، خەڵکی گۆڕانخوازی کوردستان، لەهەولێری پایتەختی کوردستانەوە سڵاوتان لێبێت. خەڵكی قەڵاو مەنارە، رۆژان و مانگانی رابردو بیرم کردن گەرچی لێتان دوربوم، بەڵام ئەمڕۆ بۆ هەر شار و شارۆچکەیەک بڕۆیت، بۆ هەر کوچە و کۆڵانێک بۆ ماڵی هەر هاوڵاتییەکی ئەم وڵاتە، خەم و ئازارەکان وەک یەکن.

ئاماژەى بەوەشکرد؛ رۆژانی رابردو سەلماندی کە هەولێر، شاری هەمومانە و جێگای دەست پێکردن و کۆتایی هێنانی هەمو کاروانێکی گۆڕانکاریمانە، "وەک چۆن هیچ شتێک وەهای لێنەکردن سڵ بکەنەوە لە خۆپێشاندان بۆ داوا رەواکانتان بە هیوام بە هەمان شێوە هیچ شتێک وەهاتان لێنەکات کە سارد ببنەوە لە دەنگدان".


دەقى وتارەکەى د. یوسف محەمەد سادق:

بە ناوی خوای گەورە و میهرەبان
هاونیشتیمانیانی ئازیز، خەڵکی گۆڕانخوازی کوردستان، لەهەولیریی پایتەختی کوردستانەوە سڵاوتان لێبێت.
خەڵکی هەولێر، خەڵكی قەڵاو مەنارە، رۆژان و مانگانی رابردو زۆر بیرم کردن. ماوەیەک لێرەبوم لە گەڵتاندا، لە خزمەتتاندا، ماوەیەکیشە سیاسەتی هەڵەی دەسەلاتدارانی کوردستان رێگریی هاتنمانی کرد بۆ ئەم شارە، ئەمڕۆ خۆشحاڵم لە نێوتاندام.
گەرچی لێتان دوربوم، بەڵام ئەمڕۆ بۆ هەر شار و شارۆچکەیەک بڕۆیت، بۆ هەر کوچە و کۆڵانێک بۆ ماڵی هەر هاوڵاتییەکی ئەم وڵاتە، خەم و ئازارەکان وەک یەکن. بۆیە لە هەرکوێیەکی کوردستان بیت وەک ئەوەیە لە هەمو جێگایەکی کوردستان بوبیت. لە کاتێکدا لە نێوان شارو شارۆچکەیەکی تردا تایبەتمەندی و جیاوازی هەیە، بەڵام خەم و ئازارەکان، وەک یەکن، بۆیە پێویستمان بە سیاسەتێکی یەکپارچەیی گشتگیری نیشتمانی هەیە کە جیاوازی نەکات لە نیوان هیچ جێگایەکی ئەم وڵاتەدا. 
خەڵکی کوردستان هەمو هەست دەکەن کە نوخبەی سیاسی لە ئەستێرەیەکە و ئەوان لە ئەستێرەیەکی تر، هەرچی ئەکەن دەنگی خەم و ناڕەزاییەکانیان پێیان ناگات. بەڵام ڕۆژانی ڕابوردو سەلماندی کە ئێرە، هەولێر، پایتەختی کوردستان شاری هەمومانە و جێگای  دەست پێکردن و کۆتایی هێنانی هەمو کاروانێکی گۆڕانکاریمانە.

هاونیشتیمانیانی ئازیز..
ئەم دەسەڵاتە ستەمکارەی هەرێم، پێویستی بە هێزیک هەبو تەماهیی لەگەڵ نەکات، نەبێتە شەریکە تاڵانی لەگەڵیدا، بەرەنگاری ببێتەوە، گەرمایی هەناوی ئێوە بگەیەنێتە کۆشک و تەلارەکانیان.. ئەوە ئێمە بوین ئەوەمان کرد، بێ ئەوەی بهێڵین شەڕ دروست بێتەوە، پێمان وتن ڕاوەستن، حوکمڕانی ئاوا ناکرێت، بەسیەتی تاڵانی، بەسیەتی بەفیڕۆدانی سامانی سەر زەوی و ژێر زەوی.. بەسییەتی مانەوە لە دەسەڵات لەدەرەوەى یاسا.
ئێمە بوین پێمان وتن ڕاوەستن، بەسیەتی بێدادی، بەسیەتی جیاوازیی گەورەی نێوان خەڵک و دەسەڵاتداران. بەسیەتی بە بارمتە گرتنی هێزی پێشمەرگەی قارەمان و هەوڵ دان بۆ بەکارهێنانیان بۆ مەرامە تایبەتەکانتان، ئەوانە رەمز و تاجی سەری نەتەوەیەکن، بە حەزە شەخسیەکانتان، ئیرادەیان مەشکێنن..
ئێمە لە بزوتنەوەی گۆڕان، نۆ ساڵ بێ وچان بە ئیرادەیەکی بەهێزەوە لە بەرامبەر هەمو هێزیان بێ چەک ڕاوەستاین و، بوینە فشارێکی جدی لەسەریان.. ئێمە و هاونیشتیمانیانمان و خەمخۆرانی تری گەلەکەمان بەردەوام لە خەباتی خۆمان بەرەوپێش ئەڕۆین، ئەوانیش دەسەڵاتی ستەمیان تادێت لەق دەبێت، هەڵبژاردنەکانی داهاتوش مژدەی ئاسۆیەکی گەشی پاش تاریکیی شەوی دەسەڵاتی ستەمکارانەی ئەمانەیان لەخۆ گرتوە، گەر خۆیان و ڕەفتارە نەشیاوەکانیان نەگۆڕن، گەل دەیانگۆڕێ..

جەماوەری بەرێزی پایتەختی کوردستان:
ئەمڕۆ لێرەین بۆ دەسپێکی قۆناغێکی نوێ.  بۆ دەسپێکی بانگەشەی هەڵبژاردنی ئەنجومەنی نوێنەرانی عێراق، کە لە هەمو ساتێکی تری ساڵانی ڕابوردو گرنگترە. بە داخەوە سیاسەتی بێ باکی و گوێ پێنەدان و ملهوڕی، هەرێمی بە شێوەیەکی ناشایستە لەبەردەم بەغدادا لاوازکردوە. کاتی ئەوەیە کە لاپەڕەیەکی نوێ هەڵدەینەوە لە چۆنێتیی پەیوەندیی نێوان کوردستان و عێراق. 
ئێمە بڕوامان وایە کە کوردستان لە عێراقدایە و عێراق لە کوردستاندایە، لە پێناو بەرژەوەندیی خەڵکی کوردستان. هەتا کوردستان بەهێز بکەین، ڕۆڵ و پێگەمان لە عێراقدا بەهێز دەبێت. ئەمە پێویستی بە سیاسەتێکی کوردستانیە، نەک حیزبی یان بنەماڵەیی. ئەگەر ئێمە بەهێزەوە لە بەغدابین ئەوا دەتوانین سود لە بەغدا وەربگرین بە سودی کوردستان. بەڵام ئەم پەیوەندییە دانوستاندنییە. بەو مانایەی ئەم پەیوەندییە دەبێت لە سودی هەردولابێت و دانوستان تەنها رێگەی بێت. 
هەموتان دەزانن کە سیستەمی سیاسی عێراقی پەرلەمانیە. سیستەمی پەرلەمانی سیستەمێکی دانوستانیە. ئێمە دەبێت هەمو ساڵێک، هەمو ساتێک بەردەوام دانوستان بکەین بۆ مافی زیاتر و باشتر، دانوستانیشمان لە سەر ئەوە وەستاوە کە ئێمە چەند بەهێزین، چەند نزیکین لە خەڵكی خۆمانەوە، چەند دەتوانین نوێنەری ڕاستەقینەی خەم و ئازارەکانی کوردستان بین،  چەند بە ڕاستی پێکەوەین. بەڵام لە سەروی هەمویەوە چەندێک ماڵی خۆمان وا رێکخستوە کە ماڵی ڕاستەقینەی هەمومان بێت.
ئێمە بۆ ئەوەی لە دانوستانماندا بەهێزبین دەبێت بە دوای هاوەڵ و دۆست و خاوەن بەرژەوەندیی هاوبەشدا بگەڕێین لە بەغدا، بەبێ سازشکردن لە سەر بەرژەوەندیە سەرەکییەکانی خەڵکی کوردستان. 
لە ماوەی ڕابوردودا دەرفەتی زۆر لە دەست درا. سەرمایەیەکی زۆر هێنرایە وڵات و بە فیڕۆ درا. دەکرا بەغدا بکرایەتە دەروازەی ئێمە بۆ دونیا، بەڵام بەبێ هیچ بەهانەیەک ئەم دەرگایە داخرا و هیچ دەرگایەکی تر نەکرایەوە. 

جەماوەری هەولێری بە شەرەف، هەمو کوردستان چاوی لە سەر جوڵەی ئێوە و کرداری ئێوەیە. کاتێک لە ڕۆژانی ڕابوردودا ئێوە رژانە شەقامەکان و داوای مافی ڕەوای خۆتان کرد، دەسەڵات ناچاربو گوێ بۆ داواکانتان بگرێت. بە هەمانشێوە کاتێک هەموتان دەچن بۆ سەر سندوقی دەنگدان و مافی دیموکراسیی خۆتان پیادە ئەکەن ئەوا بە هەمان شێوەی خۆپێشاندانەکانتان دەسەڵات ناچار دەکەن کە رەفتاری بگۆڕیت. 
وەک چۆن هیچ شتێک وەهای لێنەکردن سڵ بکەنەوە لە خۆپێشاندان بۆ داوا ڕەواکانتان بە هیوام بە هەمان شێوە هیچ شتێک وەهاتان لێنەکات کە سارد ببنەوە لە دەنگ دان. دەنگدان ئەمڕۆ لە کوردستان سوربونە لە سەر داخوازی بۆ بەردەوامی دیموکراسی، بۆ زیاتر چەسپاندنی دەسەڵاتی خەڵك، بۆ هێنانە ئارای نەرێتی گۆڕانکاری و دەستاودەست کردنی ئاشتیانەی دەسەڵات. تەنها لە رێگەی دەنگدانتان بۆ هێزە خەڵک دۆستە ڕاستەقینەکان دەتوانن پێگەی خۆتان لە کوردستان و بەغداش بەهێزبکەنەوە.

هاونیشتیمانیانی ئازیز..
دانیشتن لە ماڵەوە و بەشداری نەکردن لە دەنگدان، هیچ لە دۆخی هەرێم ناگۆڕێت، هیچ لە دۆخی هەرێم لە بەغدا ناگۆڕێت، بەڵکو دەبێتە هۆی مانەوەی ئەم دەسەڵاتە گەندەڵ و شکستخواردو و ستەمکارە لە هەرێم و، مانەوەیان لە بەغدا لە پێناوی بەرژەوەندییە حیزبی و شەخسیەکانیان و بەدەست هێنانی کورسی و پارە، نەک چارەسەر کردنی کێشە و قەیرانەکانی هەرێم و گەلەکەی لە بەغدا..
ئەمڕۆ لە کوردستان دو جۆر هێز هەن؛ هێزی بەرژەوەندخواز  و شاگردەکانیان کە دەمێکە بە هەمو شێوەیەک بە سەرچون، لە گەڵ هێزی نیشتیمانیی ڕاستەقینە. دەنگدان بە هێزە تەقلیدیەکان خراپترکردنی دۆخی کوردستانە، دەنگدان بە هێزە ساختە و شاگردەکانیان زۆر خراپترکردنی دۆخی کوردستانە. دەبێت دەنگتان بۆ هێزە  نیشتیمانیە ڕاستەقینەکان بێت، ئەوانەی کە هیچ بەرژەوەندییەکی تریان نیە جگە لە چاکسازی و گۆڕانکاری. ئەو هێزانەی کە خاوەن بەرژەوەندیی زەبەلاحن لە سایەی گەندەڵی کوردستاندا، ئالودەی ئەخلاقێک بون کە سڵ لە هیچ ناکەنەوە بۆ پەرەپێدانی بەرژەوەندی تایبەتی خۆیان، تەنانەت بازرگانیکردن بە خەم و ئازارەکانی ئێوەشەوە. ئەو هێزانەی کە تەنها لە کەڵەکەکردنی سامان و سودبینین لە گەندەڵی ئەزمونیان هەیە، تەنها درێژەپێدەری ئەوە دەبن.

ئەرکی سەرشانی هەمومانە کار بکەین بۆ هێنانە کایەی ڕۆژگارێکی باشتر بۆ خۆمان و نەوەکانمان، بۆ هێنانە کایەی گۆڕانکاریی ڕیشەیی، هەڵبژاردنیش شاڕێگای گۆڕانکارییە، بڕۆن بۆ دەنگدان و کارتی سور بە ڕوی ئەم چەند کەسە کەمە دەسەڵاتدارەی هەرێم بەرز بکەنەوە.

جەماوەری خۆشەویستی کوردستان..
بەڵێ، بەسەری بەرزەوە دێینەوە خزمەتتان، کۆڵان بە کۆڵان، شەقام بە شەقام، ئاوایی بە ئاوایی و شار بە شاری هەرێم و ناوچە جێناکۆکەکان دەگەڕێین و داوای دەنگتان لێدەکەین.. چونکە سەلماندمان کە دەنگی ئێوەمان بۆ بەدەست هێنانی دەسەڵات و مانەوە تیایدا و، بۆ بەدەستهێنانی پارە و سامان ناوێت، بەڵکو دەنگی ئێوەمان بۆ دیفاع کردن لە مافەکانی خۆتان دەوێ. دەنگی زیاتری ئێوەمان دەوێ  بۆ ئەوەی بەهێزتر بین لە هێنانە کایەی گۆڕانکاریی گەورەتر، لە هێنانەکایەی دەسەڵآتی خەڵک بۆ خەڵک، بۆ حوکمی هاوڵاتی.. دەنگی ئێوەمان ئەوێ بۆ نوێنەرایەتی کردنتان بە دور لە مەرامی شەخسی لە بەرامبەر دەسەڵآتدارانی بەغدا، بۆ دیفاع کردن لە مافەکانی گەلی کردستان لە بەغدا بە پێی دەستور..
بۆیە هاونیشتیمانیی ئازیز، ئەگەر لە دەرەوەی وڵاتی. یان لە ناوەوە، لە هەر کوێکی کوردستانیت، ئەگەر لە زاخۆی دەلالیت یان لە خانەقینی ئەڵوەند، لە دهۆکیت یان لە سۆران، لە هەڵەبجەی شەهیدیت یان لە گەرمیانی لانەی شێران و ئەنفال، لە پشدەر و ڕانیەی دەروازەی ڕاپەڕینیت یان لە ئاکرێ و مێرگەسور و شیلادزێ و ئامێدیی پێشکەوتنخواز، لە شەنگالی برینداریت یان مەخموری غەدر لێکراو لە هەولێری قەڵا و منارە و هۆلاکۆ بەزێنیت، یان لە کەرکوکی گڕکانی شۆڕش یان لە کۆیەی حاجی قادر، یان سلێمانیی هەڵمەت و قوربانیت، بێ لایەنیت یان لایەنگریت، ئەمجارە دەنگ بدەن بە لیستی (١٤٢)ی گۆڕان و کاندیدەکانی گۆڕان لە لیستی (١٨٣)ی نیشتیمان لە ناوچە جێناکۆکەکان. چونکە ئێمە بوین کە دەسەڵات و متمانەی ئێوەمان وەک ئەمانەتی گەردنمان سەیر کرد و هەرگێز خیانەتمان لێنەکرد. ئەوە ئێمەین کە بە ئیرادەیەکی بەهێزەوە بەرەنگاری ستەم دەبینەوە و، تەماهی و سازشی لەگەڵ ناکەین و، کارمان تەنها دیفاع کردنە لە بەرژەوەندیی گشتی.
لە هەمان کاتدا بە دەنگ و متمانەی ئێوە دەمانەوێ ڕۆحی کاک نەوشیروان شاد بکەین، کە سەرکردەی نیو سەدە خەبات بو لە پێناوی بەدەستهێنانی مافی خەڵکی کوردستان لە بەرامبەر دوژمنی دەرەکی و ستەمکاری ناوخۆیی خۆماڵی.

بە هیوای سەرکەوتنی گەورە بۆ خەڵکی کوردستان و جەماوەری گۆڕانخوازی هەرێم لە هەڵبژاردنی ١٢ی ٥.
هەر شاد و سەربەرز بن.

15/04/2018
زیاتر...
هیچ بابەتێک به‌رده‌ست نیه‌ .