بزوتنەوەى گۆڕان و وەفدێکى بەریتانیا کۆبونەوە
وەفدێکى بزوتنەوەى گۆڕان و کونسوڵخانى گشتى بەریتانیا لە هەولێر، کۆبونەوە و تێیدا ئەوە خرایەڕو کە بزوتنەوەى گۆڕان کارى بۆ سەروەرکردنى یاسا و حوکمى دیموکراسى کردوە و لەم هەڵبژاردنەشدا دەنگ و کورسییەکانى زیاد دەکات.

پێشنیوەڕۆى ئەمڕۆ چوارشەممە، وەفدێکى  کونسوڵخانەى گشتى بەریتانیا لە هەولێر بە سەرۆکایەتى سارا مارش بەرپرسى تیمى سیاسى کونسوڵخانەکە سەردانى مەکۆى سەرەکى بزوتنەوەى گۆڕانیان کرد و لەگەڵ محەمەد تۆفیق رەحیم، ئەندامى خانەى راپەڕاندن و هۆشیار عومەر عەلى رێکخەرى ژورى پەیوەندییە دیپلۆماسییەکان و ئەندامانى ژورەکە کۆبونەوە.

لە کۆبونەوەکەدا تاوتوێى دۆخى سیاسى ناوچەکە و هەرێم و هەڵبژاردنەکانى ئەنجومەنى نوێنەرانى عێراق کرا و وەفدى گۆڕان رونیکردەوە کە بزوتنەوەى گۆڕان لە ماوەى رابردودا راستگۆ بوە لەگەڵ بەرنامەکەى و دەنگدەرانى خۆى  و کارى بۆ سەروەرکردنى یاسا و حوکمى دیموکراسى کردوە، ئەوەش وایکردوە چاوەڕوانى زیادبونى دەنگ و کورسییەکانى گۆڕان بکرێت.

جەختیشیان کردەوە کە بزوتنەوەى گۆڕان کارى گرنگى کردوە لە پارێزگاى سلێمانى بەوەى حیزب و حکومەتى لەیەکتر جیا کردوەتەوە و پارێزگار کە سەر بە بزوتنەوەى گۆڕانە بێلایەن بوە لە کەمپەینى هەڵبژاردن و راگەیەنرا؛ گۆڕان پلان و بەرنامەى ستراتیژى دەبێت بۆ دواى هەڵبژاردنەکان بۆ بەغدا و کۆکردنەوەى نێوماڵى کوردى.
09/05/2018
زیاتر...
هیچ بابەتێک به‌رده‌ست نیه‌ .