ئاسۆ رەحیم: گۆڕان سەرکەوتنی گەورە بەدەستدەهێنێت
رێکخەری ژوری پەیجوری بزوتنەوەی گۆڕان رایدەگەیەنێت؛ هاوڵاتیان پێشوازییەکی گەرم لە بەرنامەو کاندیدەکانی لیستی (142)ی گۆڕان دەکەن و لەم هەڵبژاردنەدا گۆڕان سەرکەوتنی گەورە بەدەستدەهێنێت، دەشڵێت: هاوڵاتیان بە دەنگەکانیان لە رۆژی (12)ی ئایاردا، سزای حوکمڕانان و دەسەڵاتداران دەدەن.

ئاسۆ رەحیم، رێکخەری ژوری پەیجوری و ئەندامی جڤاتی نیشتیمانی بزوتنەوەی گۆڕان بە (سبەی) راگەیاند؛ گۆڕان هەڵمەتێکی سەرکەوتوی بانگەشەی ئەنجامداو ەو لە سەرجەم شارو شارۆچكه‌كان جۆش و خرۆشی هه‌ڵسوڕاوان و گۆڕانخوازان و هاوڵاتیان بەردەوامە و حه‌ماسێكی زۆریان هه‌یه‌و پێشوازییەکی گەرم لە بەرنامە و کاندیدەکانی لیستی (142)ی گۆڕان کراوە، ئەوەش سه‌ركه‌وتنی لیستی گۆڕان دەردەخات، چونکە هاوڵاتیان پێیانوایە تەنها گۆڕان دەتوانێت مافەکانیان بۆ بەدەستبهێنێت، هەربۆیە گۆڕان لە رابردودا سازشی لەسەر بەرنامەو بەڵێنەکانی نەکردوەو داکۆکیکاری سەرسەختی خواست و داوکارییەکانی خەڵک بوە.

وتیشی: "بەپێی ئاماژە و راپرسییە زانستییەکان، لەم هەڵبژاردنەدا گۆڕان سەرکەوتنی گەورە بەدەستدەهێنێت و رێژەی دەنگ و کورسییەکانی بەشێوەیەکی بەرچاو لە سەرجەم شارو پارێزگاکان زیاد دەکات، ئەمەش دەگەڕێتەوە بۆ ئەوەی گۆڕان بوەتە جێگای ئومێدی هاوڵاتیان بەهۆی ئەو بەرنامەو رێبازەی رەوانشاد نەوشیروان مستەفا دایڕشتوە و بزوتنەوەی گۆڕان پابەندێتی، هەروەها بەهۆی بەرنامەو شایستەیی کاندیدەکانی لیستی (142)ی گۆڕانەوە".

ئاماژەی بەوەکرد، هەرچەندە دەسەڵات کاری لەسەر بێ هیواکردنی خەڵک کرد لە پرۆسەی دەنگدان و هەڵبژاردن، بەڵام هەوڵەکانیان بێ سود بو، ئەو کەسانەی تاڕادەیەک بێ هیواش بون لەم بانگەشەیەدا بە گڕوتینێکی نوێوە دەستیان کرد بە بانگەشە، هەروەها هاوڵاتیان لەوە هوشیاترن لەلایەن دەسەڵاتەوە فریو بدرێن، بەڵکو لە رۆژی (12)ی ئایار هاوڵاتیان بە دەنگەکانیان لەسەر سندوقەکانی دەنگدان سزای دەسەڵات و حوکمڕانان دەدەن و تۆڵەی (27) ساڵ شکستی حوکمڕانی و ئازار و نەهامەتی چەندین ساڵە لەم دەسەڵاتە دەکەنەوە.

رێکخەری ژوری پەیجوری گۆڕان باسی لەوەکرد، لە رابردودا یەکێتی و پارتی لەبری جێبەجێکردنی خواست و داواکاری خەڵک، خەریکی بەرژەوەندییە تایبەتی و حیزبییەکانیان و خۆ دەوڵەمەند کردن بون، بەڵام گۆڕان لە بەغدا کاردەکات بۆ داکۆکیکردن لە مافەكانی خەڵک و دەستور و جێبەجێکردنی ماددەی (140) و بۆ ئەوەش بەرنامەو پلانی هەیە.

هەروەک پەیامی ئاراستەی هاوڵاتیان و گەنجان بە تایبەتی کرد ئەوانەی کە بۆ یەکەمجارە مافی دەنگدانیان هەیە، بە گڕوتینەوە بەشداری هەڵبژاردن بکەن و دەنگ بە لیستی (142)ی گۆڕان بدەن و ئەو رۆژە بکەنە کەرنەڤاڵی سەرکەوتن.
10/05/2018
زیاتر...
هیچ بابەتێک به‌رده‌ست نیه‌ .