نه‌وشیروان مسته‌فا پیاوێك بووه‌ له‌وپه‌ڕی نائومێدیدا ئومێدی به‌خشیوه‌ته‌وه‌و خه‌باتی بۆ كردووه‌

نه‌وشیروان مسته‌فا له‌قۆناغه‌كانی خه‌باتیدا هه‌میشه‌ شتی نوێ و ناوازه‌ی پێشكه‌شكردووه‌
نه‌وشیروان مسته‌فا له‌كاتی خۆشی و دابه‌شكردنی ده‌ستكه‌وته‌كاندا كوردستانی جێهێشتووه‌
نه‌وشیروان مسته‌فا له‌كاتی ته‌نگانه‌و ناخۆشیه‌كاندا له‌ ده‌ره‌وه‌ گه‌ڕاوه‌ته‌وه‌ بۆكوردستان

 

هه‌ركاتێك دۆخی‌ كوردستان ناله‌بار و ناره‌حه‌تی‌ بووه‌ نه‌وشیروان مسته‌فا  له‌ ده‌ره‌وه‌ گه‌ڕاوه‌ته‌وه‌، له‌خۆشی و دابه‌شكردنی پۆست و ده‌ستكه‌وته‌كاندا كوردستانی جێهێشتووه‌و له‌كاتی ناخۆشی و ته‌نگانه‌كاندا گه‌ڕاوه‌ته‌وه‌و سه‌رله‌نوێ خه‌باتی سازداوه‌ته‌وه‌، نه‌وشیروان مسته‌فا ئه‌و پیاوه‌ی ماندوبونی نه‌زانیوه‌ له‌ته‌واوی قۆناغه‌ جیاوازه‌كانی ژیانیدا پیاوێكی نائومێد و ره‌شبین نه‌بووه‌، به‌ڵكو له‌و په‌ڕی نائومێدیدا ئومێدی به‌خشیوه‌ته‌وه‌..

نه‌وشیروان مسته‌فا.. ئه‌و ناوه‌ی زیاتر له‌نیو سه‌ده‌ له‌گۆڕه‌پانی سیاسیدا دره‌وشایه‌وه‌و دواجاریش كاتێك ماڵئاوایی كرد هه‌م رێبازێكی نوێ و تازه‌ی له‌كاری سیاسیدا دروستكردبوو، هه‌م رێچكه‌یه‌كی سیاسی و ئه‌خلاقی وه‌های دانابوو كه‌ به‌شانازییه‌وه‌ سه‌دان هه‌زار كه‌س په‌یڕه‌وی لێده‌كه‌ن و هه‌وڵی سه‌رخستنی بۆده‌ده‌ن كه‌ ئه‌ویش رێچكه‌ی دژه‌ گه‌نده‌ڵی و دژه‌ نیشتیمانفرۆشی و دژه‌ هه‌ڕاجكردنی سه‌روه‌ت و موڵك و سامانی كوردستانه‌.

هه‌ر له‌سه‌ره‌تای كاری سیاسی خۆیدا نه‌وشیروان مسته‌فا له‌هیچ كات و زه‌مانێكدا كه‌ نائومێدی باڵی كێشابێت به‌سه‌ر خه‌ڵكیدا یاخود شۆڕشی كوردی پێویستی به‌ ئه‌و هه‌بوبێت نائومێد نه‌بووه‌و له‌هه‌رچی شوێنێكیش بوایه‌ خۆی گه‌یاندۆته‌ كوردستان و ئومێد به‌خشیوه‌ته‌وه‌.

ئه‌وكاته‌ی ساڵی 1968 ململانێی سیاسی له‌نێوان باڵی مه‌كته‌بی سیاسی پارتی و سه‌ركردایه‌تی پارتی ده‌گاته‌ ترۆپك و خه‌ڵك هه‌ست به‌بێتاقه‌تبون و نارازی بون ده‌كه‌ن له‌و دۆخه‌ سیاسیه‌، له‌و ساته‌وخه‌تدا له‌گه‌ڵ كۆمه‌ڵێك هاوڕێیدا گۆڤاری رزگاری ده‌رده‌كات له‌وێوه‌ شانه‌ رۆشنبیرییه‌كانی رێكخراوی كۆمه‌ڵه‌ی ره‌نجده‌رانی كوردستان گه‌شه‌ده‌كه‌ن، ئه‌وكاته‌شی كه‌ ئیدی له‌دوای ساڵی 1970 ئۆتۆنۆمی بۆ كورد راده‌گه‌یه‌نرێت و كورد له‌گه‌ڵ خۆیدا ئاشتده‌بێته‌وه‌، ئه‌و ده‌ڕواته‌ ده‌ره‌وه‌ بۆ خوێندن، به‌ڵام له‌دوای ئاشبه‌تاڵ و دوای ئه‌وه‌ی پێویستی سه‌رهه‌ڵدانی شۆڕشێكی نوێ دێته‌ كایه‌وه‌، خوێندنی دكتۆراكه‌ی له‌نه‌مسا جێده‌هێڵێت و رووده‌كاته‌ شاخه‌كانی كوردستان.

نه‌وشیروان مسته‌فا هه‌روه‌كچۆن له‌دوای ئه‌نفال و توانه‌وه‌ی شۆڕشی نوێ له‌ساڵی 1988 كوردستانی جێنه‌هێشت وله‌و ساته‌وه‌ختانه‌دا نه‌خشه‌ی شۆڕشێكی نوێ و راپه‌ڕینێكی نوێی داڕشت، بۆ ئه‌و مه‌به‌سته‌ش سوپای رزگاری كوردستانی دروستكرد كه‌ (سرك) ناسراوه‌، له‌دوای داگیركردنی كوه‌یتیش له‌لایه‌ن عێراقه‌وه‌ له‌ساڵی 1990، ئیدی ده‌بێته‌ ئه‌ندازیاری راپه‌رین و نه‌خشه‌ی راپه‌ڕینی داڕشت.
له‌دوای دروستبونی حكومه‌تی هه‌رێمیش له‌ساڵی 1992و سه‌قامگیربونی دۆخه‌كه‌، ئیدی ده‌ڕواته‌ ده‌ره‌وه‌، دواتر دوای هه‌ڵگیرسانی شه‌ڕی ناوخۆ، له‌ساڵی 1995 وه‌ك سه‌رۆكی وه‌فدی یه‌كێتی له‌ده‌ره‌وه‌ دێـته‌وه‌ بۆكۆبونه‌وه‌كانی ئاشتی، كه‌شه‌ڕیش وه‌ستا ئیدی تا ساڵی 1998 نه‌هاته‌وه‌.

یه‌كێك له‌خاسیه‌ته‌كانی نه‌وشیروان مسته‌فا ئه‌وكاتانه‌شی له‌ناو یه‌كێتیدا بوو، هه‌میشه‌ بانگه‌شه‌ی بۆ دانانی كه‌سی شیاو له‌شوێنی شیاودا كردوه‌و شه‌ڕی گه‌نده‌ڵی كردووه‌، ئه‌وه‌تا بزانن له‌دووه‌مین كۆنگره‌ی یه‌كێتی له‌ساڵی 200 دا چی ده‌ڵێت:

به‌ڵێ ئه‌وه‌ نه‌وشیروان مسته‌فابوو، ئه‌وكاته‌ی كورد گه‌یشتوه‌ به‌سه‌ركه‌وتن ئیدی ئه‌م پشوی داوه‌و ئه‌وكاته‌شی كورد له‌شكست و ته‌نگانه‌دا بووه‌ ئه‌م ده‌ستیپێكردۆته‌وه‌، ئه‌وه‌ نه‌وشیروان مسته‌فا بوو له‌هه‌موو كاتێكی نائومێدیدا ئومێدی به‌خشیوه‌ته‌وه‌و به‌دوای چاره‌سه‌رو ده‌روازه‌ی نوێدا گه‌ڕاوه‌،  هه‌ربۆیه‌ ده‌بینین دوای ساڵی 2009ئه‌وكاته‌ی ئیدی گه‌نده‌ڵی هه‌موو جومگه‌یه‌كی ئه‌م وڵاته‌ی ته‌نیوه‌ و نائومێدی رویكردۆته‌ خه‌ڵك، ئه‌م بزوتنه‌وه‌ی گۆڕان دروستده‌كات و سه‌رله‌نوێ هیوایه‌كی تازه‌تر به‌ خه‌ڵك و پرۆسه‌ی سیاسی و حوكمداری ئه‌م وڵاته‌ ده‌به‌خشێت و وه‌ك داكۆكیكارێكی سه‌رسه‌خت له‌خه‌ڵك تا دواین چركه‌ی ژیانی ده‌مێنێته‌وه‌.

20/05/2018
زیاتر...
هیچ بابەتێک به‌رده‌ست نیه‌ .