جڤاتی گشتی تاوتوێی بژاردەکان و هەنگاوی داهاتوی گۆڕان دەکات
جڤاتی گشتی بزوتنەوەی گۆڕان لە کۆبونەوەدایە و سکرتێری جڤاتیش دەڵێت: هەمو بژاردەکان لەبەردەم گۆڕان کراوەیە و دواتر راسپاردە و پێشنیارەکان رادەستی جڤاتی نیشتیمانی دەکەن.

ئەمڕۆ پێنجشەممە کۆبونەوەی جڤاتی‌ گشتی‌ بزوتنه‌وه‌ی‌ گۆڕان دەستیپێکرد به‌مه‌به‌ستی‌ گفتوگۆکردن له‌باره‌ی‌ پرسی به‌شداریكردن یان نه‌كردنی‌ بزوتنه‌وه‌كه‌ له‌ حكومه‌تی‌ داهاتوی‌ عێراق.

رەئوف عوسمان، سکرتێری جڤاتی گشتی بزوتنەوەی گۆڕان رایگەیاند؛ لە کۆبونەوەکەی ئەمڕۆدا تاوتوێی هەنگاوەکانی داهاتوی بزوتنەوەکە دەکرێت لەبارەی حکومەتی داهاتوی عێراق و هەروەها ئەو ساختەکاری و تەزویرانەی کە لەلایەن یەکێتی و پارتییەوە کراوە، چونکە ئەو کارە جۆرێک لە رەشبینی و نائومێدی لای خەڵک دروست کردوە.

وتیشی: هەمو ئەگەرەکانی بەردەم بزوتنەوەی گۆڕان کراوە و تاوتوێی هەنگاوەکانی داهاتو دەکرێت لەبەرامبەر بایکۆت یاخود بژاردەکانی دیکە لە حکومەتی داهاتوی عێراق.

سکرتێری جڤاتی گشتی بزوتنەوەی گۆڕان جەختی لە یەکڕیزی و هاوهەڵوێستی شەش لایەنەکە کردەوە لەسەر پرسەکان و ئاماژەی بەوەکرد، کە رێککەوتنەکەی نێوان ئەو شەش لایەنە تۆکمەیە و هەمویان پێکەوەن.

رونیکردەوە، لەدوای کۆبونەوەکەی ئەمڕۆ راسپاردە و پێشنیارەکان دەدرێتە جڤاتی نیشتیمانی بۆ ئەوەی لەسەر رۆشنایی ئەو پێشنیار و راسپاردانە، بڕیاری خۆی بدات.

بڕیاریشە رۆژی شەممە، جڤاتی نیشتیمانی بزوتنەوەی گۆڕان کۆببێتەوە و دواین بڕیاری خۆی لەبارەی بایکۆت یاخود بەشداری لە پرۆسەی سیاسی دەدات.

24/05/2018
زیاتر...
هیچ بابەتێک به‌رده‌ست نیه‌ .