هۆشیار عومەر: دواى هەڵسەنگاندنی بژاردەکان بڕیار دەدەین
ئەندامێکى جڤاتى نیشتیمانى بزوتنەوەى گۆڕان ناوەڕۆکى کۆبونەوەى جڤات ئاشکرا دەکات و رایدەگەیەنێت؛ لە کۆبونەوەکەدا ئامار و چۆنیەتى ساختەکاریەکان لە هەڵبژاردنەکەى (12)ى ئایار خرانەڕو، دەشڵێت:"چەند بژاردەیەکمان لەبەردەمدایە بۆ داهاتو، بەڵام کاتیشمان لەبەردەمدایە و لەگەڵ چوار لایەنەکە پێکەوە هەماهەنگى و کار دەکەین بۆئەوەى یەک بڕیار و یەک هەڵوێستمان هەبێت".

هۆشیار عومەر عەلى ئەندامى جڤاتى نیشتیمانی بزوتنەوەى گۆڕان، لەبارەى ناوەڕۆکى کۆبونەوەکەى ئەمڕۆى جڤاتەوە کە بەردەوامیى هەیە دەڵێت:"لە کۆبونەوەکەدا ئەنجامى هەڵبژاردنەکەى (12)ى ئایار و ساختەکارییەکان تاوتوێ کران، بە ئامار و بەڵگە شیواز و چۆنیەتى تەزویرەکانى هەڵبژاردنەکەمان خستەڕو، ئەوەش بۆ خەڵک بڵاو دەکەینەوە".

لەبارەى هەڵوێستى گۆڕان بۆ چۆنیەتى مامەڵەکردن لەگەڵ دۆخەکە، ئەندامەکەى جڤاتى نیشتیمانى وتى:"لە کۆبونەوەکەدا باس لە هەنگاوەکانى ئەنجومەنى وەزیرانى عێراق کرا لەبارەى ئەو لیژنەیەى پێکهێنراوە بۆ بەدواداچونى ساختەکارییەکان، سەرەتا تەنها بزوتنەوەى گۆڕان و لایەنەکانى هەرێم ئاماژەیان بە ئەنجامدانى ساختەکارى دەکرد لە هەڵبژاردنەکە، بەڵام ئێستا لە ناوخۆى عێراق و لەدەرەوەش ئەو پرسە بوەتە باس".

وتیشى: "بژاردەکانمان لەبەردەمدایە و تاوتوێیان دەکەین، چونکە لە هەردو بژاردەکەدا بابەت و رێوشوینى دیکە هەیە، هێشتا کاتمان لەبەردەمدایە و ئێمە لەگەڵ چوار لایەنەکە بڕیارمانداوە پێکەوە هەماهەنگى و کار بکەبن بۆئەوەى یەک هەڵوێستمان هەبێت و بە بەرچاو رونى و هەڵسەنگاندنى هەمو سیناریۆکان بڕیار دەدەین".

د. هوشیار عومەر ئاماژە بەوەش دەکات؛ بە ئەنجامدانى ئەم ساختەکارییە، دەسەڵات هەوڵیدا خەڵک نائومێد بکەن بۆئەوەى لە هەلبژاردنى داهاتو دەنگ نەدەن و بەشدارى پرۆسەکە نەکەن، بەڵام خۆشبەخاتە خەڵک ئێستا دەیەوێت لە هەڵبژاردندا تڵەى ئەم ساختەکارییە بکاتەوە، هەروەک وتی:"هەر لە کۆبونەوەکەى ئەمڕۆدا گفتوگۆ لەبارەى ئەوەوە کرا کە گۆڕان بە لیست و بەرنامەیەکى تۆکمە بەشدارى هەڵبژاردنەکان بکات".
26/05/2018
زیاتر...
هیچ بابەتێک به‌رده‌ست نیه‌ .