بەڵگەی ساختەکارییەکان رادەستی دادگای تەمیز کرا
رێگەپێدراوانی بزوتنەوەی گۆڕان و هاوپەیمانی بۆ دیموکراسی و دادپەروەری لەبارەگای کۆمیسیۆنی باڵای هەڵبژاردنەکان لە شاری بەغدا تانەکانیان لەئەنجامی هەڵبژاردنی پەرلەمانی عێراق پێشکەشکرد.

 

لەدوای پێشکەشکردنی تانەکان، لە کۆنگرەیەکی رۆژنامەوانیدا زمناکۆ جەلال، رێکخەری ژوری هەڵبژاردنی بزوتنەوەی گۆڕان و رێپێدراوی بزوتنەوەکە رایگەیاند؛ ماوەی چەند رۆژێکە بەهەماهەنگی لایەنە ناڕازییەکان سەرقاڵی دۆزینەوەی ئەو ساختەکارییانە بوین و ژمارەیەک بەڵگەی زۆر خراونەتەڕو، هەروەها بەهۆی زۆری ساختەکارییەکانەوە، ئەم هەڵبژاردنە کارەساتی بەسەر ئیرادەی دەنگدەراندا هێناوە.

 

وتی: "لە هەرشوێنێک ساختەکاری کرابێت، ئەوا تانە و سکاڵامان تۆمارکردوە، بڕیارە تاوەکو (10)ی حوزەیران دەستەی دادوەری کە پێکهاتون لە سێ دادوەری دادگای تەمییز، وەڵامی سکاڵا و تانەکان بدەنەوە و ئەگەر دەرەنجامەکانیش لەئاستی چاوەڕوانی دەنگدەراندا نەبو، ئەوا لە دادگای فیدراڵی سکاڵا تۆمار دەکەین، پێش ئەوەی ئەنجامی کۆتایی هەڵبژاردنەکە پەسەند بکرێت".

 

هاوکات، رێبوار کەریم، رێپێدراوی هاوپەیمانی بۆ دیموکراسی و دادپەروەری رایگەیاند؛ لەم هەڵبژاردنەدا چەند جۆرێک تەزویر کراوە، یەکێک لەو جۆرانە ئەوەیە کە لەهەندێک لە پارێزگاکانی هەرێم دەنگی پوچەڵ بۆ لایەنی دەسەڵاتدار ئەژمارکراوە، ئەمە جگە لەوەی پێناسی بۆ خەڵک دروستکراوە تا دەنگ بدەن و لە هەندێک شوێن پەنجەمۆر نەبوە.

 

ئاماژەی بەوەکرد، یەکێک لە گەورەترین پرۆسەکانی تەوزیر ئەوەبوە، کە هەمان کارتی دەنگدان کۆپی کراوە و دەیان هەزار جار بەکارهێنراوە بۆ شەش کاندیدی حیزبێک لەسلێمانی، هەروەک وتی: "حیزبەکانی دەسەڵات تەزویریان لەناو تەزویردا کردوە، واتە لەناو خۆیاندا تەزویریان بۆ ژمارەیەک کاندید کردوە".

 

رونی کردەوە، ئەوانەی لایەنەکان کردویانە بە سکاڵا بەڵگە نیە کۆییان کردبێتەوە، بەڵکو سەرجەمیان لەلایەن کۆمیسیۆنەوە رادەستی لایەنەکان کراون.

01/06/2018
زیاتر...
هیچ بابەتێک به‌رده‌ست نیه‌ .