ئەوەی پارتى و یەکێتى بڵاوى دەکەنەوە پێچەوانەكەی راستە
پارتی و یەكێتی قۆناغێکى ترى پیلانگێڕییان دژی گۆڕان دەستپێکردوە، هەر كاتێك گۆڕان سەركەوتنی بە دەستهێنابێت ئەو دو حیزبە دەسەڵاتدارە دەستیان كردوە بە شەڕی راگەیاندن و تۆمەت هەڵبەستن بۆى، ئێستاش کە گۆڕان سەلماندییەوە پابەندە بە بەها و پرەنسیپەكانی و سازش لە داخوازییەكانی خەڵك ناكات، یەكێتی و پارتی دواى پەنابردن بۆ ساختەكاری و دزینی دەنگەكانی و پەنا بۆ ناوزڕاندن و تۆمەت هەڵبەستن دەبەن.

بزوتنەوەی گۆڕان و جەماوەرەكەی کە تاکە ئامانجیان بەرژەوەندى گشتى و سەروەربونى یاسا و ئەنجامدانى چاکسازى و روبەڕوبونەوەى گەندەڵییە، راهاتون بەو هەمو تۆمەتانەی پارتی و یەكێتی ماوەی نۆ ساڵە دەیدەنە پاڵ بزوتنەوەكە، لەهەر هاوڵاتییەكی ئەم هەرێمە بپرسی بۆچی دو حیزبی دەسەڵاتدار هەركات دەستیان كردوە بە تۆمەت هەڵبەستن و هێرشی میدیایی بۆ سەر گۆران، یەكسەر دەزانێت كە گۆڕان لە شوێنێكدا تەنگی بەو دو حیزبە هەڵچنیوە.

بۆ هەڵسوڕاوانی گۆڕان هیچ سەیر نییە لە رۆژێكدا رۆژنامەیەكی سەر بە باڵی ئەمنی پارتی و رۆژنامەیەكی سەر بە باڵی ئەمنی یەكێتی تۆمەتی هاوشێوە لە دژی گۆڕان بڵاوبكەنەوە، یاخود رۆژانە چەندین میدیای سێبەری ئەو دو حیزبە كاریان بوبێتە ناوزڕاندن و تۆمەت بڵاوكردنەوە لەسەر گۆڕان و سەركردەكانی.

بۆ نمونە رۆژنامەی باس دەڵێت گۆڕان پارە لە یەكێتی وەردەگرێت و رۆژنامەی ژیانیش دەڵێت شوقە و ڤێلا وەرگرتن لەناو بزوتنەوەی گۆڕاندا پەرەی سەندوە، یان لەناو گۆراندا كێشەی ناوخۆیی هەیە.

لەو رۆژەوە گۆڕان دامەزراوە، ئەو دو حیزبە تۆمەت نەماوە بۆی هەڵنەبەستن، هەموشی بۆ ئەوە دەگەڕێتەوە كە یەكێتی و پارتی لە قورسایی و كاریگەریی گۆڕان دەترسن، لەماوەی نۆ ساڵی رابردودا هەر كاتێك گۆڕان سەركەوتنێكی بە دەستهێنابێت ئەوا ئەو دو حیزبە دەسەڵاتدارە دەستیان كردوە بە شەڕی راگەیاندن و تۆمەت هەڵبەستن بۆ گۆڕان، ئێستاش كە جارێكی دیكە گۆڕان سەلماندییەوە پابەندە بە بەها و پرەنسیپەكانی و سازش لەسەر داخوازییەكانی خەڵك ناكات، یەكێتی و پارتی جارێك پەنا بۆ ساختەكاری و دزینی دەنگەكانی دەبەن و جارێكیش پەنا بۆ ناوزڕاندن و تۆمەت هەڵبەستن دەبەن.

بە بۆچونی هەندێك لە هەڵسوراوانی بزوتنەوەی گۆڕان ئەم تۆمەت هەڵبەستنانەی ئەمجارەی میدیاكانی پارتی و یەكێتی، قۆناغی چوارەمی پیلانگێڕی ئەم دو حیزبەیە لە دوای (12)ی ئایارەوە لە دژی بزوتنەوەی گۆڕان، بە جۆرێك لە قۆناغی یەكەم دەنگەكانی گۆڕانیان دزی بۆ ئەوەی گۆڕان لە بەغدا لاواز بكەن، لە قۆناغی دوەمدا بە چەك و هێرشكردنە سەر مەكۆی سەرەكی گۆڕان ویستیان گۆڕان چاوترسێن بكەن بەوەی واز لە باسكردنی ساختەكارییەكانی هەڵبژاردنەكەی (12)ی ئایار بهێنێت، بەڵام لەمەیاندا سەرنەكەوتن و گۆڕان نەك تەسلیمی ئیرادەی ئەوان نەبو بەڵكو لەسەر ئاستی كوردستان و هەمو عێراقیشدا هێزی دەستپێشخەربو لە ئاشكراكردنی ساختەكارییەكان.

لە قۆناغی سێیەمیشدا هەمو هەوڵێكیاندا وەفد بنێرنە لای گۆڕان بۆ ئەوەی رازی بكەن واز لەوە بهێنێت كە لە بەغدا كار بكات بۆ هەڵوەشانەوەی ئەنجامە راگەیەنراوەكانی هەڵبژاردن و بە دەست ژماردنەوەی دەنگەكان، بەڵام لەمەشیاندا ئیرادەی گۆڕان سەركەوت و ئەوان شكستیان هێنا.

دوای ئەوەی یەكێتی و پارتی لە هەمو هەوڵەكانیان لە دژی گۆران شكستیان هێنا، لە ئێستادا خەریكی جێبەجێكردنی قۆناغی چوارەمی پیلانەكەیانن لە قۆناغی ناوزڕاندن و بوختان هەڵبەستن و شەڕی راگەیاندنە، لەم قۆناغەشدا بەوپێیەی پێشتر و لە ساڵانی رابردودا هەرچی تۆمەت هەیە بۆ گۆڕانیان هەڵبەستوە، هیچ نەماوە پەنای بۆ نەبەن ئەوە نەبێت كە بەرپرسانی گۆڕان پارە و شوقە لەم و لەو وەردەگرن و بە دەست كێشەی ناوخۆییەوە دەناڵێنن.

وادیارە ئەو میدیاكار و بەرپرسانەی پارتی و یەكێتی هێشتا نەیانزانیوە كە هاوڵاتیانی هەرێم زۆر باش لەوە تێگەیشتون كە هەرچی میدیاكانی ئەوان بڵاوی بكەنەوە، پێچەوانەكەی راستە و باوەڕ بە پێچەوانەكەی دەكەن.
03/07/2018
زیاتر...
هیچ بابەتێک به‌رده‌ست نیه‌ .