پرسە نامە

هەواڵ و چالاکی

بەداخەوە، درەنگانى شەوی رابردو، لە ئەنجامى ھەوڵێکی چەپەڵى تیرۆریستان؛ په‌لاماری سەنگەرەکانی هێزى پێشمەرگە لە سنوری کوڵەجۆ درا و بەھۆیەوە پێنج پێشمەرگە شەهید بون.

‎بەم بۆنە خەمناکەوە، پرسە و پەژارەى خۆمان ئاڕاستەى بنەماڵەى هەریەکە لە شەھیدان: (ئیبراهیم بارام، ئیسماعیل محەمەد، ئەمین حسێن، ئاراس سەمین و نەبەرد سەعید) دەکەین، کە لەو هێرشە ترسنۆکانەیەدا شەهید بون. لە خوای گەورە داواکارین گیانى پاکیان بە بھەشت شاد بکات و سەبورى و ئارامى بە خانەوادەکانیان و هەموان ببەخشێت.

‎بزوتنەوەى گۆڕان لەم بۆنە خەمناکەدا، جگە لە پرسە و هاوخەمى بۆ بنەماڵەى شەهیدانى ئەو کردەوە تیرۆریستیە، هیوای زو چاکبونەوەش بۆ بریندارەکان دەخوازێت و جەخت لەسەر بنەما و پرەنسیپە نەگۆڕەکانى دەکاتەوە لەپێناو یەکخستنەوە و رێکخستنەوەى هێزى پێشمەرگەى کوردستان و کۆمەککردنى ئەو گیانلەسەردەستانەى لە بەرەکانى پێشەوەى روبەڕووی مەرگ دەبنەوە بۆ پاراستنى خاکى کوردستان.

‎جەختیش دەکەینەوە لە پێویستى هەماهەنگى زیاتر لەنێوان هەرێمى کوردستان و حکومەتى فیدراڵ بۆئەوەى ئەو بۆشاییە ئەمنییەى لە نێوان هەردولادا هەیە پڕ بکرێتەوە و ئەو کەلێنانە نەهێڵرێت کە تیرۆرستان لێوەى دزە بکەن و پەلامارى سەنگەرەکانى هێزى پێشمەرگە بدەن.

‎بزوتنەوەى گۆڕان
‎٢٨ی١١ی٢٠٢١