بزوتنەوەى گۆڕان: بەشداری هاونیشتیمانیان لە هەڵبژاردن و دەنگدان لە ناوچە کوردستانییە دابڕێنراوەکان گوزارشتە لە ئاستی بەرزی بەرپرسیارێتی ئینتیما بۆ نەتەوە و نیشتمان

ڕاگەیەندراوی فەرمی

بزوتنەوەى گۆڕان رایدەگەیەنێت: بەشداری سیاسیی هاونیشتمانیانی کورد لەڕێگەی هەڵبژاردنەوە؛ هەنگاوێکە بۆ ڕوبەڕووبەبونەوەی دۆخی داسەپاوی ناوچە کوردستانییە دابڕێنراوەکان، بۆ ڕاگرتنی پرۆسەی تەعریب و زەوتکردنی مافی جوتیارانی کورد، بۆ پێکهێنانی حکومەتی خۆجێی نوێ، کە بە ئاڕاستەی زیادکردنی خزمەتگوزارییەکان و ئاوەدانکردنەوەی گوندە وێرانەکان هەنگاو بنێت.

لە راگەیەندراوێکدا کە بەبۆنەى نزیکبونەوەى وادەی هەڵبژاردنی ئەنجومەنی پارێزگاکانی عێراق، بەتایبەت لە سنوری ناوچە کوردستانییە دابڕێندراوەکانی کەرکوک، موسڵ، سەلاحەدین و دیالە ئاڕاستەى هاونیشتمانی ناوچە کوردستانییە دابڕیندراوەکانى دەکات، بزوتنەوەى گۆڕان ئەوەدەخاتەڕو کە؛ پێویستی بەشداریکردن لە پرۆسەکە و بە جێگەیاندنی ئەم ئەرکە نیشتمانی و نەتەوەیی و دیموکراتیە زیاتر دەبێت و "بەشداریتان لەپرۆسەی هەڵبژاردن و دەنگدانتان بە لیستە کوردییەکان، سەرەڕای ڕەخنە و ناڕەزایەتیتان لە شێوازی حوکمڕانی و ئیدارەدان و کەمی خزمەتگوزاری چەند ساڵی ڕابردوو؛ گوزارشتە لە ئاستی بەرزی بەرپرسیارێتیتان بەرامبەر چارەنوسی ئێستا و داهاتوی ناوچەکانتان و ئینتیما بۆ نەتەوە و نیشتمان و سەلماندنەوەی ناسنامەی کوردستانیی کەرکوک و تەواوی ناوچە کوردستانیە دابڕێنراوەکان".





هاونیشتمانیان لە ناوچە کوردستانییە دابڕیندراوەکان..
خوشک و برایانی بەڕێز..

لەگەڵ نزیکبونەوەمان لە وادەی هەڵبژاردنی ئەنجومەنی پارێزگاکانی عێراق، بەتایبەت لە سنوری ناوچە کوردستانییە دابڕێندراوەکانی کەرکوک، موسڵ، سەلاحەدین و دیالە؛ پێویستی بەشداریکردن لە پرۆسەکە و بە جێگەیاندنی ئەم ئەرکە نیشتمانی و نەتەوەیی و دیموکراتیە زیاتر دەبێت.

بەشداریتان لەپرۆسەی هەڵبژاردن و دەنگدانتان بە لیستە کوردییەکان، سەرەڕای ڕەخنە و ناڕەزایەتیتان لە شێوازی حوکمڕانی و ئیدارەدان و کەمی خزمەتگوزاری چەند ساڵی ڕابردوو؛ گوزارشتە لە ئاستی بەرزی بەرپرسیارێتیتان بەرامبەر چارەنوسی ئێستا و داهاتوی ناوچەکانتان، هاوکات خۆشەویستی و ئینتیما بۆ نەتەوە و نیشتمان و سەلماندنەوەی ناسنامەی کوردستانیی کەرکوک و تەواوی ناوچە کوردستانیە دابڕێنراوەکان لە ڕێگەی ڕەوایەتی دەنگدان و پرۆسەی دیموکراتی.

لە ڕوانگەی ئێمەوە، بەشداری سیاسیی هاونیشتمانیانی کورد لەڕێگەی هەڵبژاردنەوە؛ هەنگاوێکی ڕاستە بۆ ڕووبەڕووبەبونەوەی دۆخی داسەپاوی ئەو ناوچانە، بۆ ڕاگرتنی پرۆسەی تەعریب و زەوتکردنی مافی جوتیارانی کورد، بۆ پێکهێنانی حکومەتی خۆجێی نوێ، کە بە ئاڕاستەی زیادکردنی خزمەتگوزارییەکان و ئاوەدانکردنەوەی گوندە وێرانەکان هەنگاو بنێت، لە هەمو ئەم هەنگاوانەش لەپێشتر؛ بەهێزبونی پێگەی کورد لەسەر تەرازوی دەنگدان پاڵپشتییە بۆ زەمینەسازی لە جێبەجێکردنی مادەی (١٤٠)ی دەستوریی عێراقی و هاوسەنگی لە حوکمڕانی خۆجێی ئەو ناوچانە.

بزوتنەوەی گۆڕان
١٤ی ١٢ی ٢٠٢٣