بزوتنەوەى گۆڕان پیرۆزبایی دەکات و هۆشداریش دەدات لەپێناو باشکردنى ژیانى خەڵک

ڕاگەیەندراوی فەرمی

بزوتنەوەى گۆڕان لەبارەى بەردەوامیی قەیران و کێشە چارەسەرنەکراوەکانى نێوان حکومەتى هەرێم و حکومەتى ئیتیحادى هۆشدارى دەدات و رێگەچارەى چارەسەرکردنى گرفتەکان رادەگەیەنێت.

 لە پەیامێکى پیرۆزباییدا بەبۆنەى هاتنى ساڵى نوێوە؛ بزوتنەوى گۆڕان رایدەگەیەنێت؛ هاوڵاتیانی هەرێمی کوردستان ساڵانێکە باجى بڕیار و سیاسەتى هەڵە و کێشە چارەسەرنەکراوەکانی نێوان حکومەتی هەرێم و حکومەتی ئیتحادی دەدەن؛ ساڵى ڕابردوشمان بە قەیرانى سەختى دارایی و بێ موچەیی موچەخۆران و مامۆستایان بەڕێکرد، هەربۆیە ئەرکى حکومەتى هەرێم و لایەنە سیاسییەکانە لە غیابى پەرلەمان و ئەنجومەنە هەڵبژێردراوەکاندا؛ حەکیمانە و بەرپرسیارانە مامەڵە بکەن و بە پلان و دیدگای نیشتیمانى و کوردستانی مامەڵە لەگەڵ حکومەتی ئیتحادی و لایەنە سیاسیە عێراقییەکان بۆ چارەسەری کێشەکان بکەین.

دەقى پەیامەکەى بزوتنەوەى گۆڕان:

‎ سا‎ڵی نوێتان پیرۆزبێت..

‎بەبۆنەی هاتنی ساڵی نوێی زاینی (2024)، پیرۆزباییەکی گەرم لە کریستیانەکان و، ھاوڵاتیانی ھەرێمی کوردستان و ڕەوەندی کوردی و بەشەکانى دیکەى کوردستان، عێراق و مرۆڤایەتی دەکەین.

‎سەرەڕای دۆخی جەنگ و ململانێ و کێشمەکێشی سیاسیی ناوچەکە، هاوکات نەبونی ئاشتی و سەقامگیری سیاسیی، گەلەکەمان لەکاتێکدا پێدەنێتە ساڵى نوێوە؛ دەرگیری زنجیرەیەک قەیران و کێشە و ئاڵنگارى و پێشهاتى چاوەڕوانکراوە، ئومێد دەکەین ساڵی نوێ ساڵی تێپەڕاندنی ئەو ناخۆشی و ئاستەنگ و قەیرانانە بێت، ساڵی دروستبونی کۆدەنگیی نیشتمانی بە ئاراستەی بونیادنانی حوکمڕانی دروست بێت، کە هاونیشتیمانیان لە سایەیدا حەساوە و خزمەتگوزاری و دابینکردنی پێداویستیەکان بگەنە ئاستی چاوەڕوانکراو و دڵخوازی هاوڵاتیان.

‎هاوڵاتیانی هەرێمی کوردستان ساڵانێکە باجى بڕیار و سیاسەتى هەڵە و کێشە چارەسەرنەکراوەکانی نێوان حکومەتی هەرێم و حکومەتی ئیتحادی دەدەن؛ ساڵى ڕابردوشمان بە قەیرانى سەختى دارایی و بێ موچەیی موچەخۆران و مامۆستایان بەڕێکرد، کە بەداخەوە واخەریکە ساڵێکی خوێندنی قوتابیان و خوێندکارانی پارێزگای سلێمانی و هەڵەبجە دەفەوتێت، هاوتەریب چارەنوسی نەوت و شایستە داراییەکانی هەرێم و کێشە هەڵپەسێردراوەکان لە عێراقدا بە نادیاری ماونەوە، هەربۆیە ئەرکى حکومەتى هەرێم و لایەنە سیاسییەکانە لە غیابى پەرلەمان و ئەنجومەنە هەڵبژێردراوەکاندا؛ حەکیمانە و بەرپرسیارانە مامەڵە بکەن و، بە پلان و دیدگای نیشتیمانى و کوردستانی مامەڵە لەگەڵ حکومەتی ئیتحادی و لایەنە سیاسیە عێراقییەکان بۆ چارەسەری کێشەکان بکەین.

‎لە کۆتایدا، دوبارە پیرۆزبایی لە هەموتان دەکەین و ھیوادارین ساڵی نوێ؛ ساڵی خێر و خۆشی بۆ ھەمو لایەک بێت.