سوعاد عەبدولڕەزاق: ئامانج و هەوڵمان بۆ پاراستنى قەوارەى هەرێم و هاوڵاتییانى مەدەنییە

ژمارەیەک لە ژنانى سەرکردایەتى نێو هێز و لایەنە سیاسییەکانى هەرێمى کوردستان داوا لە نەتەوە یەکگرتوەکان دەکەن بە بڕیارێک هێرشى ئاسمانى و درۆن بۆ سەر هەرێمى کوردستان قەدەغە بکات، بە ئامانجى پاراستنى هاوڵاتیانى سڤیل و ژن و منداڵ و گوند و شوێنە گەشتیارییەکان.

لەو یاداشتەدا کە ئاڕاستەى جنین پلاسخارت، نوێنەرى سکرتێرى گشتى نەتەوەیەکگرتوەکان لە عێراق-یان کردوە، ژنانى سەرکردایەتى لایەنە سیاسییەکان داواى راگرتنى ئەو هێرشە موشەکییانە دەکەن کە ناوبەناو دەکرێتە سەر هەرێمى کوردستان و دەبێتە هۆى زیانگەیاندن بە ناوچە کشتوکاڵیی و گوندنشینان و بونە قوربانیی هاوڵاتی سڤیل و ژن و منداڵ، ئەوە بە پێچەوانە و پێشێلکردنى بڕیارى (1325)ى ئەنجومەنى ئاسایشى نەتەوە یەکگرتوەکان لەقڵەم دەدەن کە بڕیارەکە جەخت لە پاراستنى ژن و منداڵ دەکاتەوە لە شەڕ و ناکۆکییەکاندا.

سوعاد عەبدولڕەزاق، ئەندامى جڤاتى نیشتیمانى بزوتنەوەى گۆڕان لەبارەى ناوەڕۆک و ئامانجى یاداشتەکەوە بە سایتى (گۆڕان)ى راگەیاند: بەداخەوە لەئەنجامى تۆپباران و بۆردومانى چەند ساڵى رابردوى وڵاتانى دراوسێ بەتایبەت تورکیا و ئێران بۆ ناوچە سنورییەکان، سەدان هاوڵاتى هەرێم و تەنانەت گەشتیاریش بونەتە قوربانى و سەدان گوند و ناوچەى گەشتیارى و کشتوکاڵى کاول کراون و چۆڵ کراون.

وتیشى: ئێستا نەک تەنیا فڕۆکە و تۆپخانە بەڵکو بە درۆن هێرش دەکرێت، بۆیە ئەو هەوڵ و یاداشتى هەمانە بۆ ئەوەیە بڕیارێک لە نەتەوەیەکگرتوەکان دەربکرێت وەک بڕیارى (688)ى ساڵى (1991) بۆ پاراستنى هەرێمى کوردستان لە هێرشى درۆنەکان لە هەر لایەکەوە بێ.
دەشڵیت: لە ئایندەدا بە شێوەیەکى فراوانترتریش کار لەسەر ناوەڕۆکى یاداشتەکەمان دەکەین و ئامادەشین بچینە بەغدا و یاداشتەکە بدەینە وەزارەتى دەرەوەى عێراق و رەنگە لە داهاتودا رێکخراوەکانى کۆمەڵى مەدەنیش بێنینە ناو پڕۆسەکە و لەگەڵ سەرۆکایەتى هەرێم و پەرلەمانیش کۆببینەوە بۆ دروستکردنى کۆدەنگى زیاتر لەسەر ئەم پرسە کە ئامانج لێى پاراستنى قەوارەى هەرێم و هاوڵاتیانى مەدەنى و ناوچە گەشتیارى و کشتوکاڵییەکانە لە هەر هێرشێک".