وەزیرى دارایی: پابەندین بەو رێککەوتنەى لەگەڵ حکومەتى ئیتیحادى کردومانە

وەزیرى دارایی و ئابورى رایدەگەیەنێت؛ پابەندین بەو رێککەوتنەى لەگەڵ حکومەتى ئیتیحادى کردومانە و هەندێک گۆڕانکارى لە لیژنەى دارایی کراوە کە پێچەوانەى رێککەوتنى نێوان حکومەتى هەرێم و حکومەتى فیدراڵە و لەکاتێکدا بەپێى یاسا و دەستور لیژنەى دارایی پەرلەمان مافى ئەو دەستکاریکردنەیان نییە و ئەوەى کردویانە بۆ دروستکردنى کیشەیە

ئاوات جەناب نورى، وەزیرى دارایی و ئابورى حکومەتى هەرێمى کوردستان لە کۆنگرەیەکى رۆژنامەوانیدا رێککەوتنى نێوان حکومەتى هەرێم و حکومەتى عێراق و دواین پێشهاتەکان و گۆڕانکارییەکانى لیژنەى دارایی ئەنجومەنى نوێنەران لە پڕۆژە یاساى بودجەى گشتى عێراقى خستەڕو.

وەزیرى دارایی ئاشکراى دەکات؛ لیژنەى دارایی مافى ئەوەیان هەیە هەندێک گۆڕانکارى لە بڕى پارە و موناقەلە بکەن، بەڵام مافى لابردنى دەقیان نیە و "هەندێک لەو دەستکاریەى کردویانە جگە لەوەى دەستورى و یاسایى نیە، بۆ دروستکردنى کیشەیە".

جەختیش دەکاتەوە لەوەى ئەو رێککەوتنەى حکومەتى هەرێم لەگەڵ حکومەتى ناوەندى کردویەتى دەرەنجامى گفتوگۆیەکى دور و درێژ و دانوستانە بەسەرپەرشتى هەردو سەرۆک وەزیران لەنێوان وەزیرانى دارایی و سامانە سروشتیەکان و نەوت کراوە، حکومەتى هەرێم پابەندى رێککەوتنەکەیە.

جەختیش دەکاتەوە لەوەى ئەولەویەتى وەزارەتى دارایی دابینکردنى موچەى فەرمانبەرانە.