کوێستان محەمەد: پاراستن و گرنگی پێدانى منداڵان بە ئەرکى سەرشانمان دەزانین

وەزیرى کار و کاروبارى کۆمەڵایەتى رایدەگەیەنێت؛ پاراستن و گرنگی پێدانى منداڵان بە ئەرکى سەرشانمان دەزانین لە دامەزراوەکانى سەر بە وەزارەتمان، لەو چوارچێوەیەدا خانەى منداڵى پەرەتەوازەمان هەیە ئەو منداڵانەى لە سەرشەقامن شیاندنەوەیان بۆ دەکەین ئەو سەنتەرانەش کە پێشتر (٩٠%)یان داخرابون کردوماننەتەوە و تێیاندا منداڵ فێرى چەندین هونەر و وەزرش دەبێت.

کوێستان محەمەد، وەزیرى کار و کاروبارى کۆمەڵایەتى لە رۆژى جیهانى منداڵاندا لەگەڵ پیرۆزبایی لە منداڵان، دەڵێت: ئەرکى ئێمەیە گرنگى بە منداڵان و پاراستنیان لە دایەنگاکان یان لە خانە و پەیمانگاکان و سەنتەرەکانى ئۆتیزم، لەو سۆنگەیەشەوە سیاسەتى پاراستنى منداڵمان لە ئەنجومەنى وەزیران پەسەند کردوە کە بەشێکى تایبەتە بە منداڵى ئیشکەر و گرفت و چارەسەر و رێکارەکان دیاریکراوە لەگەڵ ئەو لایەنانەى بەرپرسن لە جێبەجێکردنى هەر لە وەزارەتى ئێمە و ناوخۆ و پەروەردە و رێکخراوى یونیسێف.

وتیشى: وەزارەتى کار و کاروبارى کۆمەڵایەتى لە سەرجەم پارێزگا و قەزاکان سەنتەرى چالاکى و گەشەپێدانى منداڵانمان هەیە کە پێشتر (٩٠%)یان داخرابون، ئێستا کارامان کردونەتەوە بۆ فێرکردنى مەلەوانى و مویزیک و هونەر هەروەها خانەى منداڵى پەرەتەوازەمان هەیە بۆ شیاندنەوەى ئەو منداڵانەى لە سەرشەقامن و دەیانخەینەوە بەر خوێندن و کاریشیان بۆ دەدۆزینەوە لە سلێمانى شەش منداڵمان هەیە و لە دهۆکیش هەمانە.

کوێستان محەمەد دەڵێت: شانازی دەكەین كە توانیومانە لە ماوەی رابردوو هاوكات لەگەڵ پێشكەشكردنی خزمەتگوزارییەكانمان لەسەر ئاستی كۆمەڵگا بە گشتی، منداڵانمان بكەینە چەقی بایەخ و بازنەی گرنگی پێدان، و بە یەك چاو تەماشاكردن و مامەڵە كردن لەگەڵ منداڵی ئاسایی و كەم ئەندام و منداڵی كورد و منداڵی كوردستان نشین لە ئاوارەو پەناهێندەكان كە ئێستا لە كوردستان دەژین.