بزوتنەوەی گۆڕان: داهاتی نەوت بۆ خزمەتی خەڵک و ئاوەدانی و خۆشگوزەرانی بێت

04/04/2023

ڕاگەیەندراوی فەرمی

ئەمڕۆ (٣٢) ساڵ تێدەپەڕێت، بەسەر چۆڵکردنی تەواوەتی شاروشارۆچکەکانی هەرێم و کۆڕەوی ملیۆنی، وەک نا-یەکی دەستەجەمعی بۆ ڕەتکردنەوەی دامودەزگاکانی ڕژێمی بەعس، کە ئەنجامەکەی بە دەرکردنی بڕيارى (٦٨٨)ى ئه‌نجومه‌نى ئاسايشی نێوده‌وڵه‌تى و دروستکردنی پەرژینێکی نێودەوڵەتی، بۆ پاراستنی خاک و خەڵکی هەرێمی کوردستان لە هەر دەستدرێژییەک تەواو بو.

کۆڕەو وەرچەرخانێکى گرنگ بو لە مێژوی خەڵکى کوردستان و کاریگەریەکەی بە ئەندازەیەک بو؛ میدیاى جیهانى ناچارکرد لەپاڵ ڕوماڵکردنی ڕوداوەکە، تاوانە یەک لەدواییەکەکانى ڕژێمی بەعسی بەرامبەر گەلی کورد ئاشکرا کرد و ڕاىگشتى جیهانی بەشێوەیەک خوڵقاند، شوناسێکی جیهانی بە بەر دۆزە ڕەواکەیدا کرد.

ئەمساڵ لە کاتێکدا یادى ئەم هەڵوێستە مەزنەی گەلەکەمان دەکەینەوە، هەرێمى کوردستان دەرگیری کۆمەڵێک قەیران و کێشەی ناوخۆیی و دەرەکییە، بەشێک لە میدیا جیهانیەکان، دۆستەکانى کورد لەکۆمەڵگەى نێودەوڵەتى و ڕێکخراوەکانى مافی مرۆڤ؛ ڕەخنە لە شێوازی حوکمڕانی هەرێم و مامەڵەی دەسەڵاتداران سەبارەت بە مافەکانی مرۆڤ و ئازادییەکان و پرسە دیموکراتیەکان دەگرن، بەشێکی دیکەشیان هۆشیاری دەدەن، ئەگەر بە خۆماندا نەچینەوە، هەمو ئەو دەستکەوتانەی بە قوربانیدانی میللەتەکەمان و پشتیوانی کۆمەڵگەی نێودەوڵەتی بەدەستهاتوە؛ لەبەردەم مەترسی و ئاڵنگاریدان.

لێرەوە، بەرپرسیارێتی نیشتیمانی و نەتەوەیی وادەخوازێت؛ لەبری ململانێی حیزبی و کەسی، لەبری شەڕکردن بۆ بەرژەوەندی تایبەت و گروپ گروپێنە، بە جدی بەپیر داخوازییەکانی خەڵکەوە بچین و چاکسازییە ناوخۆییەکان وەڵامگۆی داواکارییەکانی خەڵک و کۆمەڵگەی نێودەوڵەتی بێت، هاوکات لە پرسی ئیدارەدانی مەلەفی نەوتیش ڕێککەوتن لەگەڵ حکومەتی ئیتحادی باشترین بژاردەیە، بەشێوەیەک لەسەر بنچینەی دەستور و پاراستنی مافی کورد و شایستە داراییەکانی هەرێم بێت، داهاتەکەشی بۆ خزمەتی خەڵک و ئاوەدانی و خۆشگوزەرانی بێت.

بزوتنەوەی گۆڕان
٤ی نیسانی ٢٠٢٣


هەواڵی زیاتر