گوڵستان سەعید: بانگەوازەکەى ئێمە بۆئەوەیە پەرلەمان و حکومەت و لایەنەکان و بەرپرسیارانە مامەڵە بکەن

سەرۆکى فراکسۆنى گۆڕان رایدەگەیەنێت؛ ئەو دۆخەى لە نێوان یەکێتى و پارتى دروستبووە، کاریگەرى کردوەتە سەر دەرونى خەڵک و بازاڕیش، بۆیە پێویستە ناکۆکییەکان چارەسەر بکرێن و لەو سۆنگەیەشەوە فراکسیۆنەکەمان بانگەوازەکەى بڵاوکردەوە و دەشڵێت: پێویستە پڕۆژە یاساى بودجە بێتە پەرلەمان، بۆئەوەى ئێمە و خەڵکیش بزانین داهات چۆن کۆدەکرێتەوە و چۆن خەرج دەکرێ.

گوڵستان سەعید سەرۆکى فراکسیۆنى گۆڕان لەپەرلەمانى کودستان، ئاماژە بەوە دەکات ئەو بانگەوازەى ئاڕاستەى سەرۆکایەتى پەرلەمان و حکومەت و لایەنە سیاسییەکانیان کردووە، ئێمە دەزانین رەوشێکى ناسەقامگیر هەیە، بانگەوازمان کردووە بۆئەوەى لایەنەکان و پەرلەمان و حکومەت بەرپرسیارانە مامەڵە لەگەڵ دۆخەکە بکەن و چیتر نەبنە هۆى بارگرانى بەسەر خەڵکەوە.

سەرۆکى فراکسیۆنى گۆڕان رونى دەکاتەوە؛ ئەم دۆخەى لە نێوان یەکێتى و پارتى دروستبووە، کاریگەرى کردووەتە سەر دەرونى خەڵک و بازاڕ و ئابورى، بۆیە پێویستە ناکۆکییەکان چارەسەر بکرێن.

هەروەک بەپێویستى دەزانێت پڕۆژە یاساى بودجە رەوانەى پەرلەمان بکرێت بەتایبەت دواى رێککەوتنەکەى حکومەتى هەرێم و حکومەتى ئیتیحادى و دەڵێت: پێویستە یاساى بودجە بیتە پەرلەمان، تا خەڵک و ئیمەش بزانین سەرچاوەکانى داهات چین و چۆن کۆدەکرینەوە و چۆن خەرج دەکرێت و هاوڵاتیان چۆن لێى سودمەند دەبن، لەگەڵ ئەوەشدا بزوتنەوەى گۆڕان هەمیشە جەختى کردووەتەوە لەو بەرنامە چاکسازییەى کە لەسەرى دروستبووە و مانەوەشى لە حکومەت هەر لەسەر ئەو بەرنامەیەیە کە لەسەرى رێککەوتووە و دیدگاى ئێمە بۆ پەرلەمان و حکومەت کارکردنە بەبێ جیاوازى، خزمەتکردنى هاوڵاتییانە بەبێ لەبەرچاوکردنى ئاراستەى سیاسی و حزبى.