ئەنجومەنی قەزای پشدەری بزوتنەوەی گۆڕان: لە یادى بۆردومانى قەڵادزێدا لەگەڵ خەڵکەکەمان دەوەستین و پشتگیرى داواکارییەکانیان دەکەین

ئەنجومەنی قەزای پشدەری بزوتنەوەی گۆڕان، لە یادى راپەڕین و بۆردومانى (24ى 4)ى قەڵادزێدا، راگەیەنراوێکى بڵاوکردەوە و دەڵێت: تا دێ ژماره‌ی ساڵه‌كانی یادی كاره‌سات و ڕاپه‌ڕینه‌كانی قەزاکەمان زیاتر ده‌بێت و ژماره‌ی به‌ڵێنه‌كانیش بۆ ئاوه‌دانكردنه‌وه‌و خزمەتکردنی ناوچەکەمان هەڵدەکشێ.

لە راگەیەنراوەکەدا، وێراى نەویکردنى سەرى رێز بۆ قوربانیان و شەهیدانى ساڵیادى راپەڕین و بۆردومانى (24ى 4ى 1974 و 24ى 4ى 1982)ى قەڵادزێ، ئەنجونەنى پشدەرى بزوتنەوەى گۆران جەختیش دەکاتەوە لە داواکارییەکانیان، بۆ خزمەتى پشدەرییەکان.

هەروەک داوا دەکات، دوابەدوای جێبەجێکردنی ڕێککەوتن لەگەڵ حکومەتی ئیتحادی‌ له‌ بودجه‌ی عێراق و دواتر لە ئامادەکردنی پڕۆژە بودجه‌ی هه‌رێم پلانی ئاوەدانکردنەوە و گەشەپێدانی سێکتەرە خزمەتگوزاریەکانی پشدەر دابنێن.

دەقى راگەیەنراوەکە:

كه‌سوكاری سه‌ربه‌رزی شه‌هیدان..
‎‌‌خەڵکی خۆڕاگری قەزای پشده‌ر..

لە ساڵیادی بۆردومان و ڕاپەڕینی (٢٤ی٤ی١٩٧٤ و ٢٤ی٤ی ١٩٨٢) سەری ڕێز و نەوازش بۆ قوربانیان و شەهیدانی ئەو دوو ڕوداوە خەمهێنەی ناوچەکەمان دادەنەوێنین و لەگەڵ خواست و داواکاری کەسوکاری قوربانیەکان دەمێنینەوە.
ئەگەرچی تا دێ ژماره‌ی ساڵه‌كانی یادی كاره‌سات و ڕاپه‌ڕینه‌كانی قەزاکەمان زیاتر ده‌بێت و ژماره‌ی به‌ڵێنه‌كانیش بۆ ئاوه‌دانكردنه‌وه‌و خزمەتکردنی ناوچەکەمان هەڵدەکشێ، بەڵام بەداخەوە بە کردار هیچ لە ژیانی خەڵکەکەمان نەگۆڕاوە و داواکارییەکانمان بۆ خزمەتی ناوچەکەمان بەر دیواری بێدەنگی و بێباکی کێشە دروستکراوەکانی حیزب لەناو حکومەتدا دەکەوێت.
ئەمساڵ لە کاتێکدایە یادی بۆردومان و ڕاپەڕینی (٢٤ی٤) دەکەینەوە، بە پێویستی دەزانین بانگەواز ئاڕاستەی حکومەت و لایەنی پەیوەندیدار بکەین، بەپیر داخوازی خەڵکی قوربانیدەری پشدەر بێن ‌و‌ حكومه‌تی هه‌رێم دوابەدوای جێبەجێکردنی ڕێککەوتن لەگەڵ حکومەتی ئیتحادی‌ له‌ بودجه‌ی عێراق و دواتر لە ئامادەکردنی پڕۆژە بودجه‌ی هه‌رێم پلانی ئاوەدانکردنەوە و گەشەپێدانی سێکتەرە خزمەتگوزاریەکانی ئەم ناوچەیە دابنێت، بۆئەوەی لایەنیکەم بەرپرسان لەم یادەدا ترسیان لێنەنیشێ بۆ بەشداریکردن لەگەڵ هاوڵاتیان و هاوکاتیش گیانی پاكی شه‌هیدان ئاسودە بکرێت.

ئەنجومەنی قەزای پشدەری بزوتنەوەی گۆڕان
٢٤ی٤ی٢٠٢٣