ئەنجومەنى قەزاى کفرى رێزلێنان دەبەخشێتە ژورى رۆژنامەوانى و میدیاى گۆڕان

ئەمڕۆ یەکشەممە (2024/6/9)، ئەنجومەنى قەزاى کفرى بزوتنەوەى گۆڕان سەردانى ژورى رۆژنامەوانیان کرد لە مەکۆى سەرەکى و رێزلێنانیان بەخشیە ژورى رۆژنامەوانى و میدیاى گۆڕان لەپاى پاڵپشتى و روماڵى بەردەوامى میدیاى گۆڕان بۆ خۆپیشاندان و داواکارییەکانى خەڵکى شارەکە.

رۆڤان سەروەت، باژێروانى کفرى بزوتنەوەى گۆڕان ئاماژەى بە رۆڵى میدیاى گۆڕان کرد لە گەیاندنى داخوازییەکانى خەڵکى کفرى و روماڵى بەردەوامى خۆپیشاندانەکانى ساڵى رابردوى دانیشتوانى قەزاکە بۆ دابینکردنى خزمەتگوزارى و جێبەجێکردنى کۆمەڵێک پڕۆژە و رەخساندنى هەلى کار، وتیشى: ئێمە بەردەوام دەبین لە فشار و هەوڵەکانمان بۆ خزمەتکردنى زیاترى شارى کفرى و خەڵکەکەى و پشتیوان و پاڵپشتى تەواوى داواکارییە رەواکانیان و چاودێر دەبین بەسەر جێبەجێکردنى ئەو بەڵێنانەى بەرپرسانى حکومى لە ماوەى خۆپیشاندانەکاندا بە ئێمەو خەڵکیشیان داوە، جگە لە نرخاندنى روماڵى بەردەوامى میدیاى گۆڕان، داواکارین میدیاکەش بەردەوامبێت لەگەیاندنى داواکارییەکان و دەنگى ناڕەزایەتى و داواکارى خەڵک.

لاى خۆیەوە د. ئەرکان رەئوف، پێزانینى ئەنجومەنى قەزاى کفرى بۆ ژورى رۆژنامەوانى و میدیاى گۆڕان بەرزنرخاند و رایگەیاند: بزوتنەوەى گۆڕان و میدیاکەى پاڵپشتى داواکارى خەڵک لە سەرجەم ناوچە جیاوازەکان بە ئەرکى ئەخلاقى و میدیایی خۆى دەزانێت، میدیاى گۆڕان بەردەوام دەبێت لە روماڵ و گەیاندنى داخوازییەکانى خەڵکى کفرى و تەواوى ناوچەکانى دیکەى کوردستان بە ئامانجى بەدەمەوچونى لایەنە پەیوەندیدارەکان بۆ داواکارییەکان و دابینکردنى ژیانێکى شایستە ب خەڵک.

لەو دیدارەدا کە ژمارەیەک لە میدیاکار و ئەنجومەنى بەڕیوەبردنى میدیاى گۆڕان ئامادەى بون، گفتوگۆکرا لەبارەى دۆخى میدیا و داواکارى رەواى خەڵک بەشێوازى مەدەنى بۆ فشارکردن بە ئامانجى خزمەتى زیاترى خەڵک.