وێنە؛ راڤەکردنى سێ کتێب سەبارەت بە پڕۆژە و فۆرمێکى خۆماڵى بۆ حکومڕانى و دەوڵەتدارى

ئەمڕۆ شەممە (١٠ى ٨ى ٢٠٢٤)، ژورى رۆژنامەوانى لە مەکۆى سەرەکى بزوتنەوەى گۆڕان لە سلێمانى، کۆڕێکى بۆ راڤەکردنى سێ کتێبى (لامەرکەزیەت؛ نەخشە رێگایەکى نیشتمانى، دامەزراوە و ریفۆرم، دامەزراوە و گەندەڵى) نوسەر لاوک سەڵاح رێکخست و ژمارەیەکى بەرچاو لە هەڵسوڕاوان و گۆڕانخوازان و تیمى حکومەتى هەرێم و حکومەتى خۆجێى ئامادەى بون.

لاوک سەڵاح، لەبارەى ناوەڕۆکى کتێبەکان و ئامانج لێى رایگەیاند: هەر سێ کتێەکە گرێدراوى یەکترن و دیدێکە بۆ بەخۆماڵیکردنى پڕۆژەى حکومڕانى و دەوڵەتدارى، هەوڵێکیشە بۆئەوەى لەو تێکستە باوانەى هەیە دەربازبین و بیناکردن هەبێت بۆ پڕۆسەى حکومڕانى لە هەرێمى کوردستان بۆئەوەى باشتڕ هەرێمەکە بەڕێوە ببرێ.

وایشى: پێویستمان بەوە هەیە بەردەوام دیدى نوێ و بیرۆکەى تازەمان هەبێت لەسەر لامەرکەزیەت بۆ پاراستنى هەرێمەکەمان و دورکەوتنەوە لە کەرتبون و پەرتەوازە بون و سەرچاوە دارایی و نیشتمانییەکان بپارێزین و ناوچەکان نوێنەرایەتى راستەقینەیان هەبێ و وەک یەک هەرێمى کوردستان ببەینە پێشەوە، بۆ هەمو ئەوانەش دیدێکى سیاسی پیشەییمان پێویستە کە ئەم دەستەواژە نوێیە لە ئەدەبیاتى سیاسى بە ماناى ئەوەیە سیاسەت بکەین بە پیشە بۆئەوەى باشتر ئیدارە و بودجە بەڕێوەببەین و پلانیش دابنێیت بۆ ئایندە.

دواتر ئامادەبوان بە سەرنج و بۆچونەکانیان بەشدارییان کرد لە گفتوگۆ پەیوەست بە پرسى لامەرکەزیەت و دامەزراوە و گەندەڵى و ریفۆرم بۆ بۆچونەکان ئاڵوگۆڕکران.