نوێنەری گۆڕان لە سویسرا داوای بەدەنگەوەهاتنی بەپەلەی کۆمەڵگەی نێودەوڵەتی دەكات بۆ پاراستنی هاووڵاتیانی مەدەنی لە ڕۆژئاوای کوردستان

لە چوارچێوەی هەوڵە دیپلۆماسییەکان بۆ گەیاندنی دەنگی مەدەنییانی ڕۆژئاوای کوردستان، لە شارۆچکەی ڤیندش لە کانتۆنی ئارگاو، کۆبوونەوەیەکی باڵا لە نێوان نوێنەرانی کورد و سەرکردایەتی پارتی سۆسیال دیموکراتی سویسرا (SP) بەڕێوەچوو.
لە کۆبوونەوەکەدا کە بە ئامادەبوونی سێدریک ڤێرمووت (Cédric Wermuth)، هاوسەرۆکی پارتی سۆسیال دیموکرات و ژمارەیەک لە ئەندامانی فراکسیۆن و ئەنجومەنی پارتەکە بەڕێوەچوو، ڕەوشی نالەباری شاری حەلەب و ئەو مەترسییە گەورانەی ڕووبەڕووی گەلی کورد دەبنەوە تاوتوێ کران.
ڕەفیق عەبدوڵا، ئەندامی پارتی سۆسیال دیموکرات و بەرپرسی ئەنجومەنی سویسرای بزووتنەوەی گۆڕان، وەک بەشداربوویەکی سەرەکی کۆبوونەوەکە، بە وردی باسی لەو جینۆساید و پێشێلکارییە مرۆییانە کرد کە لەلایەن میلیشیاکانی سووریاوە بەرامبەر بە ژن و منداڵ و هاووڵاتیانی مەدەنی ئەنجام دەدرێن.
بەڵێنی پشتیوانی و هەڵوێستی فەرمی
لای خۆیەوە، سێدریک ڤێرمووت، هاوسەرۆکی SP، نیگەرانی قووڵی خۆی بەرامبەر بە ڕەوشی مرۆیی لە حەلەب دەربڕی و بەڵێنیدا کە ئەم پرسە وەک بابەتێکی گرنگ لە ڕێگەی نوێنەرانیان لە حکومەت و پەرلەمانی سویسرا بخەنە ڕوو. ناوبراو جەختی کردەوە کە پارتەکەیان هەڵوێستی ڕوونی دەبێت بەرامبەر بەو پێشێلکاریانەی بەرامبەر گەلی کورد دەکرێن.
کەسایەتییە بەشداربووەکان:
جگە لە هاوسەرۆکی پارتەکە، ژمارەیەک کەسایەتی دیار لە کۆبوونەوەکەدا ئامادە بوون، لەوانە:
•         گابریێلا سۆتەر (Gabriela Suter): نوێنەری کانتۆنی ئارگاو لە ئەنجومەنی نوێنەران.
•         سیمۆنا بێزیرک (Simona Brizzi): سەرۆکی فراکسیۆنی پارتەکە.
•         بەرپرسانی سێ شارەوانی جیاواز لە کانتۆنی ئارگاو.
لە کۆتایی دیدارەکەدا، نامەیەکی فەرمی لەلایەن نوێنەری بزووتنەوەی گۆڕانەوە پێشکەش بە پارتی سۆسیال دیموکرات کرا، کە تێیدا داوای بەدەنگەوەهاتنی بەپەلەی کۆمەڵگەی نێودەوڵەتی و حکومەتی سویسرا کرابوو بۆ پاراستنی هاووڵاتیانی مەدەنی لە ڕۆژئاوای کوردستان.
پارتی سۆسیال دیموکرات (SP) دووەم گەورەترین هێزی سیاسی سویسرایە و خاوەنی ٤٢ کورسی پەرلەمان و ٢ وەزارەتە لە کابینەی حەوت وەزارەتییەکەی حکومەتی فیدراڵی سویسرا، ئەمەش گرنگییەکی سیاسی گەورە بەم جۆرە دیدارانە دەبەخشێت.