نوێنەری بزوتنەوەی گۆڕان لەگەڵ باڵوێزی عێراق لە سوید كۆدەبێتەوە

نوێنەری بزوتنەوەی گۆڕان گرفت و ئاستەنگ و پێداویستی و داواكارییەكانی رەوەندی كوردی دەگەیەنێتە باڵوێزی عێراق لە سوید و ئامادەیی گۆڕان دەردەبڕێت بۆ رۆڵبینین بە ئامانجی چارەسەر، لە بەرامبەردا باڵیۆزی عێراق ستایشی دەستپێشخەریەكە و رۆڵ و چالاكیەكانی گۆڕان دەكات و داوا دەكات بەشداری چالاكیەكان بكەن بۆ هەماهەنگی و كاری پێكەوەیی.

لە چوارچێوەی چالاکییە دیپلۆماسییەکانی بزوتنەوەی گۆڕان لە دەرەوەی وڵات، کۆراز بابان، بە نوێنەرایەتی بزوتنەوەی گۆڕان لە وڵاتی سوید، سەردانی باڵوێزخانەی کۆماری عێراقی کرد لە شاری ستۆکهۆڵم و لەلایەن د. محەمەد عەدنان مەحمود، باڵوێزی عێراقەوە پێشوازی لێکرا.
لە دیدارەکەدا بارودۆخی ڕەوەندی کوردی لە وڵاتی سوید و ئەو ئاستەنگە یاسایی و کارگێڕییانەی ڕوبەڕویان دەبێتەوە گفتوگۆكرا، تێیدا نوێنەری بزوتنەوەی گۆڕان ئامادەیی تەواوی بزوتنەوەکەی دەربڕی بۆ کارکردن وەک پردێکی پەیوەندی لە نێوان هاووڵاتیان و کونسوڵخانەی عێراق، بە مەبەستی خێراکردنی ڕێکارەکان و گەیاندنی کێشەکانیان بە لایەنی پەیوەندیدار.
لای خۆیەوە، باڵوێزی عێراق دەستخۆشی لە دەسپێشخەرییەکەی گۆڕانی کرد و جەختی لە گرنگی بەشداریی کارای بزوتنەوەی گۆڕان کردەوە و داوای کرد لە کۆبوونەوە خولی و دەورییەکانی لایەنە سیاسییە عێراقییەکان لە سوید، بە ئامانجی یەکخستنی هەڵوێستەکان و خزمەتکردنی زیاتری پەنابەران و نیشتەجێبووان بەشداریبکەین.

ئەم دیدارە لە چوارچێوەی هەوڵە بەردەوامەکانی بزوتنەوەی گۆڕان دێت بۆ چالاککردنی ڕۆڵی نوێنەرایەتییەکانی لە دەرەوە و دروستکردنی پەیوەندییەکی دروست لەگەڵ دامەزراوە فەرمییەکان، بۆ دابینکردنی ژیانێکی شایستەتر بۆ ڕەوەندی کوردی لە تاراوگە.