وەزیری كاروباری كۆمەڵایەتی: ئەركی ئێمەیە خزمەتی خاوەن پێداویستییە تایبەتەكان بكەین
04/08/2019
كوێستان محەمەد وەزیری كارو كاروباری كۆمەڵایەتی بەڵێنی دا پشتیوانی لە هەر پڕۆژە یاسایەك بكات كە لە خزمەتی كورتەباڵاكان و خاوەن پێداویستییە تایبەتەكان و هەمو ئەو چین و توێژانەی تردابێت كە لەچوارچێوەی مامەڵەی وەزارەتەكەیاندایە.
لە سەردانێكیدا بۆ بارەگای كۆمەڵەی كورتەباڵاكانی كوردستان لە سلێمانی، كوێستان محەمەد رایگەیاند: وەزارەتەكەی ئەوان مامەڵەی لەگەڵ كۆمەڵێك چین و توێژی زۆر بەرفراواندا هەیە كە تائێستا وەك پێویست هاوكاری نەكراون لەكاتێكدا كە ئەوان پێویستە زۆرترین ئاوڕیان لێ بدرێتەوە و گوێیان لێ بگیرێت و هەوڵبدرێت پێداویستییەكانیان دابین بكرێت و كەموكوڕییەكانیان
چارەسەر بكرێت.
وتیشی: ئێمە لە خولی سێیی پەرلەماندا زۆر هەوڵماندا یاسای تایبەت بە كورتەباڵاكان جیا بكەینەوە لە یاسای خاوەن پێداویستیە تایبەتەكان، چونكە پێداویستیی كورتە باڵاكان جیاوازە لە پێداویستی خاوەن پێداویستیە تایبەتەكان و دەبێ بە جیاوازی مامەڵەیان لەگەڵ بكرێت، لە ئێستاشدا قسەمان لەگەڵ پەرلەمان كردوە ئەو پڕۆژەیەی ئامادەتان كردوە لێتان وەربگرن و هەركاتێك پڕۆژەكە چوە پەرلەمانەوە و خوێندنەوەی یەكەم و دوەمی بۆ كرا، وەزیری پەیوەندیدار بانگ دەكرێت، ئەو كاتە ئێمە وەك وەزارەت دڵنیاتان دەكەینەوە كە پشتیوانتان دەبین.
هەروەك بەڵێنیشی دا بەدواداچونی پێویست بۆ داوا و کێشەکانیان بکات و ئەوەی پێویست بێ بۆ خاوەن پێداویستیە تایبەتەکان و کورتە باڵاکانی ئەنجام بدات.
ئاشکراشیکرد دوای جەژنی قوربان ئەو خاوەن پێداویستیە تایبەتانەی موچەکانیان راگیرابو، بەڵام پشکنینەوەیان بۆ کرابو، موچە راگیراوەکانیان وەربگرن، کە ژمارەیان زیاتر لە (13) هەزار خاوەن پێداویستی تایبەتە و وەزیری دارایی و ئابوری رەزامەندی دەربڕیوە بۆ خەرجکردنی موچەکانیان.
سلێمانی/ ئاری لوقمان