برزۆ مەجید: بەهیچ شێوەیەک سازش لەسەر مافی کەمئەندامان ناکەین

کەمئەندامان سەردانی ئارامگەی رەوانشاد نەوشیروان مستەفا دەکەن و داوا دەکەن وەک چۆن ئەو سەرکردەیە پاڵپشت و هاوکاری بەردەوامی چینی هەژار و کەمئەندامان بوە، بەهەمان شێوەش نوێنەرانی گۆڕان لە حکومەت لە خزمەتی خاوەن پێداویستییە تایبەتەکاندا بن، ئەندامێکی خانەی راپەڕاندنی گۆڕانیش دەڵێت: بەهیچ شێوەیەک سازش لەسەر مافی کەمئەندامان ناکەن.

ئەمڕۆ یەکشەممە، بەبۆنەی رۆژی جیهانی کەمئەندامانەوە، ژمارەیەک لە خاوەن پێداویستییە تایبەتەکان سەردانی ئارامگەی رەوانشاد نەوشیروان مستەفایان کرد و لە لێدوانێکیشدا سامان حسێن، سەرۆکی لقی سلێمانی رێکخراوی کەمئەندامان رایگەیاند؛ وەک چۆن لە رابردودا رەوانشاد نەوشیروان مستەفا پاڵپشت و خەمخۆری چین هەژاران و خاوەن پێداویستییە تایبەتەکان بوە، پێویستە نوێنەرانی گۆڕانیش لە حکومەت لەسەر هەمان بەرنامە و رێبازی نەوشیروان مستەفا بن.

وتیشی: چینی کەمئەندامان لەماوەی رابردودا پشتگوێ خرابون، بۆیە لەم کابینەیەدا شایستەی ئەوەن کە گرنگی تایبەتیان پێبدرێت و لەگەڵ خەم و ئازاری کەمئەنداماندا بن.

لای خۆیەوە، چیا نەوشیروان مستەفا پشتیوانی خۆی بۆ خاوەن پێداویستییە تایبەتەکان دوپات کردەوە و جەختی کردەوە لەوەی کە گۆڕان پشتئەستورە بە پشتیوانی خەڵک بۆیە دەستبەردارى داواکارییەکانیان نابێت و بەردەوام دەبێت لە پاڵپشتییان.

برزۆ مەجید، ئەندامی خانەی راپەڕاندنی بزوتنەوەی گۆڕان ئاماژەی بەوەکرد، کە تیمی گۆڕان لە حکومەت خزمەتکاری هاوڵاتیان دەبن و جەخت دەکەنەوە لەسەر پشتیوانیکردن و بە دەمەوەچونی کێشەکانی خەڵک.

رونیکردەوە، لە هەفتەی داهاتودا لە کۆبونەوەی خانەی راپەڕاندن لەگەڵ وەزیرەکانی گۆڕان، لە رێگەی وەزیری کارو و کاروباری کۆمەڵایەتی جەخت لەسەر پشتیوانی و هاوکاریکردنی زیاتری کەمئەندامان دەکەنەوە.

سلێمانی - بڕیار نامیق