گۆڕان سەردانی کۆنسوڵگەریی ژاپۆن دەکات

وەفدێکی بزوتنەوەی گۆڕان سەردانی نوسینگەی کۆنسوڵخانەی ژاپۆن لە هەرێمی کوردستان کرد و لەلایەن هیتۆشی ئیشیزوکا Hitoshi Ishizuka کۆنسوڵی ژاپۆن پێشوازییان لێ کرا.

لە دیدارەکەدا، گفتوگۆ لەسەر پەرەپێدانی پەیوەندییەکان و رۆڵی ژاپۆن لە پشتیوانیی گەشەپێدانی ژیانی سیاسی، بەهێزکردنی دیموکراسی و حوکمڕانیی باش لە هەرێمی کوردستان کرا. وەفدی گۆڕان کە پێکهاتبوون لە دلێر عەبدولخالق و ڕۆڤان سەروەت و چۆمان محەمەد خواستی بزوتنەوەکەیان بۆ سودوەرگرتن لە ئەزمونی ژاپۆن لە بەهێزکردنی دامەزراوەکان، شەفافیەت و ئیدارەدانی کارا لە کایەی حوکمڕانی و پارتە سیاسیەکان نیشاندا.

هەروەكا دەرفەتەکانی سوودوەرگرتن لە بەرنامەکانی هاوکاریی ژاپۆن بۆ عێراق و هەرێمی کوردستان، لەوانە بەرنامەکانی ئاژانسی جایکا لە بواری تواناسازی، تاوتوێ کران. لەگەڵ گرنگیی پەرەپێدانی گفتوگۆ و ئاڵوگۆڕی ئەزموونی لەگەڵ پارتە سیاسی و دامەزراوە پەیوەندیدارە ژاپۆنییەکان خستەڕوو، بە ئامانجی بەهێزکردنی کاری حزبی و بەشداریی دیموکراتی.