کونسوڵی گشتی ڕوسیا سەردانی بزوتنەوەی گۆڕان دەکات

D هەواڵ و چالاکی

ئەمڕۆ دووشەمە، ماکسیم ڕووبین (Maxim Rubin) کونسوڵی گشتی دەوڵەتی ڕووسیای فیدڕاڵ سەردانی مەکۆی سەرەکی بزوتنەوەی گۆڕانی لە شاری سلێمانی کرد و لەلایەن دانا ئەحمەد مەجید رێکخەری گشتی پێشوازی کرا.

لە سەرەتای دیدارەکەدا، کونسوڵی گشتی ڕووسیا لە هەرێمی کوردستان پیرۆزبایی بەستنی کۆنفرانسی بزوتنەوەی گۆڕان و هەڵبژاردنی رێکخەری گشتی و ئەندامانی جڤاتی نیشتمانی کرد و هیوای سەرکەوتنی بۆ خواستن.

لای خۆیەوە، رێکخەری گشتی گۆڕان بەخێرهاتنی شاندی كۆنسوڵخانەی رووسیای کرد و، وەک یەکێک لە نوێنەرایەتییە دیپلۆماسییە چالاکەکان وەسفی کردن، کە پەیوەندیەکی تەندروستیان لەگەڵ دامەزراوە حکومی و حزبی و ئەکادیمییەکانی هەرێم هەیە.

لەو دیدارەدا جەختکرایەوە لە پاراستنی سەروەریی خاکی هەرێم و عێراق ئاسایشی ناوچەکە لەو ئاڵۆزی و هێرشانەی ناوچەکەی گرتووەتەوە. لەو بارەیەوە هەوڵەکان بۆ هێنانەدی ئاشتیەکی بەردەوام بە پێویستی قۆناغەکە باسکرا، کە ئاشتی و سەقامگیری لە بەرژەوەندی هەموو لایەنەکە.

لەبارەی پەیوەندییەکانی حکومەتی هەرێم و ئیتحادی، دانا ئەحمەد مەجید رێکخەری گشتی گۆڕان داوای کرد باڵوێزخانە و کونسوڵخانەی رووسیا لە عێراق و هەرێمی کوردستان ڕۆڵی کاریگەری خۆیان ببین لە چارەسەرکردنی کێشەکانی هەولێر و بەغدا و پاراستنی مافە دەستوورییەکانی خەڵکی کوردستان، بەتایبەت پارێزگاریکردنی لە تایبەتمەندییەکانی سیستمی فیدڕاڵی لە عێراقدا.