بزوتنەوەی گۆڕان: لە نەورۆزدا بانگەوازی بەخۆداچونەوە و بەیەکەوەکارکردن دەکەین
20/03/2023
ڕاگەیەندراوی فەرمی
بزوتنەوەى
گۆڕان لە جەژنى نەورۆزدا بانگەوازی بەخۆداچونەوە و بەیەکەوەکارکردن دەکات و
رایدەگەیەنێت: قوڵبونەوەی کێشەی حیزبە فەرمانڕەواکان و ململانێی کەسی و پەرتەوازەیی
گوتاری سیاسیی کورد لە بەغدا، مەترسییەکانی سەر دەستکەوتەکانی نەتەوەکەمانی زیاتر
کردوە و دەرفەت و هەلەکانی لاوازتر کردوە.
لەو پەیامەدا
کە بەبۆنەى جەژنى نەورۆزەوە بڵاوى کردەوە، بزوتنەوەى گۆڕان ئاماژە بەوە دەکات؛ ئەمساڵ
هاوڵاتیان لە کاتێکدا ئاهەنگەکانی جەژنی نەورۆز دەگێڕن و بە خۆشی و دڵشادییەوە بەرەو
وەرزی بەهار و نوێبوونەوە دەچن، ڕەخنەکان لەناوخۆ و دەرەوە لەسەر شێوازی حوکمڕانی هەرێم
زیاتر بون، قوڵبونەوەی کێشەی حیزبە فەرمانڕەواکان و ململانێی کەسی کاریگەری نەرێنی
لەسەر ئەدائی دامەزراوەکانی حکومڕانی، بەتایبەت پەرلەمان و حکومەت داناوە، بەم دۆخەشەوە
ئاستی خزمەتگوزاری و بەپیرەوەچونی داخوازییەکانی هاوڵاتیان لە ئاستی چاوەڕوانیدا
نیە.
هەروەک لە پەیامەکەدا هاتوە؛ لەم جەژنی نەتەوەییەدا،
بزوتنەوەی گۆڕان بانگەوازی بەخۆداچونەوە و بەیەکەوەکارکردن و وەلانانی کێشە حیزبیەکان
دەکات، بەشێوەیەک باشترکردنی ژیان و گوزەرانی هاونیشتیمانیان و دروستکردنەوەی رەوایەتی
سیاسیی و متمانەی هاوڵاتیان بە حوکمڕانی کوردی لە پێشینەی ئەرکە سیاسیەکان بێت.
دەقى پەیامەکەى
بزوتنەوەى گۆڕان
جەژنی نەورۆز و سەری ساڵی نوێی کوردی (٢٧٢٣)، لە ھاوڵاتیانی ھەرێمی
کوردستان، کوردانی کەرکوک و ناوچە ئیدارییەکانی دەرەوەی هەرێم، هاونیشتیمانیانی ڕۆژهەڵات
و ڕۆژئاوا و باکوری کوردستان، ڕەوەندی کوردی و گەلانی ناوچەکە پیرۆز دەکەین.
ئەم بۆنە نەتەوەییە، ھاوکاتە لەگەڵ یادی سەرکەوتنی ڕاپەڕینی خەڵکی کوردستان
و ئازادکردنی شاری کەرکوک لە بەهاری ساڵی (١٩٩١)دا، واتە یادەوەری دوجەژنەی هاوڵاتیانی
هەرێمی کوردستان و دانیشتوانی کەرکوک و ناوچە دابڕێندراوەکانە و نیشانەی سەرکەوتنی
خەباتی ڕزگاری نیشتیمانییە.
جەژنی نەورۆز، کە بۆنەیەکی گرنگی نەتەوەییە، گوزارشتە لە وانەکانی بەرگری بۆ
پاراستنی خاک و زمان و ڕەگەزە بنەڕەتییەکانی پاراستنی نەتەوەکەمان، لەو ڕاستییەوە،
بزوتنەوەی گۆڕان جەختدەکاتەوە لەسەر بەدیھێنانی ئامانجە باڵاکانی خەڵکی کوردستان و
داڕشتنی ستراتیجێکی نیشتیمانی، بەشێوەیەک بۆ ناوخۆی هەرێمی کوردستان پەیڕەوی لە
چاکسازییەکی هەمەلایەن بکەین و، بۆ بەغداش یەکگرتویی و پێکەوەیی لەسەر بنچینەیی
پاراستنی دەستکەوتە بەدەستهاتووەکانی گەلەکەمان بکەینە کارنامەی کارلەسەرکراو.
لای هەموان ئاشکرایە، ئەمساڵ هاوڵاتیان لە کاتێکدا ئاهەنگەکانی جەژنی نەورۆز
دەگێڕن و بە خۆشی و دڵشادییەوە بەرەو وەرزی بەهار و نوێبوونەوە دەچن، ڕەخنەکان لەناوخۆ
و دەرەوە لەسەر شێوازی حوکمڕانی هەرێم زیاتر بون، قوڵبونەوەی کێشەی حیزبە فەرمانڕەواکان
و ململانێی کەسی کاریگەری نەرێنی لەسەر ئەدائی دامەزراوەکانی حکومڕانی، بەتایبەت پەرلەمان
و حکومەت داناوە، بەم دۆخەشەوە ئاستی خزمەتگوزاری و بەپیرەوەچونی داخوازییەکانی
هاوڵاتیان لە ئاستی چاوەڕوانیدا نیە.
ئەم وێنە گشتییەی هەرێمی کوردستان و پەرتەوازەیی گوتاری سیاسیی کورد لە بەغدا،
مەترسییەکانی سەر دەستکەوتەکانی نەتەوەکەمانی زیاتر کردوە و دەرفەت و هەلەکانی
لاوازتر کردوە، هەربۆیە لەم جەژنی نەتەوەییەدا؛ بزوتنەوەی گۆڕان بانگەوازی بەخۆداچونەوە
و بەیەکەوەکارکردن و وەلانانی کێشە حیزبیەکان دەکات، بەشێوەیەک باشترکردنی ژیان و
گوزەرانی هاونیشتیمانیان و دروستکردنەوەی ڕەوایەتی سیاسیی و متمانەی هاوڵاتیان بە
حوکمڕانی کوردی لە پێشینەی ئەرکە سیاسیەکان بێت.
هیوادارین ساڵی داهاتو، هەمومان بەیەکەوە، لە کوردستانێکی ئازاد و سەربەخۆ،
بە هیوا و ئومێدەوە، ئاگری نەورۆز بکەینەوە.
بزوتنەوەی گۆڕان
٢٠ی ئازاری ٢٠٢٣