گۆڕان و پارتی رێککەوتنەکەیان ئیمزا دەکەن
18/02/2019
ئەمڕۆ گۆڕان و پارتی دەقی رێککەوتنە سیاسییەکەیان ئیمزا دەکەن بۆ پێکهێنانی
حکومەتی نوێ و چوار ساڵی داهاتوی حوکمڕانی لە هەرێمی کوردستان.
پەیامنێری (سبەی) رایگەیاند: دوای پەسەندکردنی دەقی رێککەوتننامەی سیاسی
نێوان بزوتنەوەی گۆڕان و پارتی دیموکراتی کوردستان بۆ پێکهێنانی کابینەی نوێی
حکومەتی هەرێم و چوار ساڵی داهاتوی حوکمڕانی لە هەرێمی کوردستان، لەلایەن ئەنجومەنی
سەرکردایەتی پارتی و جڤاتی نیشتیمانی بزوتنەوەی گۆڕانەوە، بڕیارە سەعات (11)ی
پێشنیوەڕۆی ئەمڕۆ رێککەوتنەکە بە فەرمی لەنێوان شاندی دانوستانی هەردولایەن ئیمزا
بکرێت.
رایگەیاند: لە بارەگای مەکتەبی سیاسی پارتی لە پیرمام رێککەوتنەکە ئیمزا
دەکرێت و پێش ئیمزاکردنیشی کۆبونەوەیەکی دیکە لەنێوان شاندی دانوستانی هەردو لایەن
ئەنجام دەدرێت و دواتر رێککەوتنەکە ئیمزا دەکرێت.
پەیامنێری (سبەی) رایگەیاند: شاندی بزوتنەوەی گۆڕان هەمواری لە
رێککەوتنەکەی نێوان پارتی و گۆڕان کردوە، سەبارەت بە بەرکەوتەکانی هەڵبژاردنەکان و پۆستەکان و بەشداریی بزوتنەوەی گۆڕان لە حکومەتدا.
وتیشی :" هەموارەکە لە کۆبونەوەی جڤاتی
نیشتیماندا کراوە و دوای گفتوگۆ و پەسەندکردنی رێککەوتنەکە ئیمزا دەکرێت".
ئێوارەی شەممە، دوای چەند گەڕێکی کۆبونەوە و گفتوگۆ، شاندی دانوستانی
بزوتنەوەی گۆڕان و پارتی دیموکراتی کوردستان لەسەر رەشنوسی رێککەوتنی سیاسی نێوان
هەردولا گەیشتنە رێککەوتن و دواتر دوێنێ یەکشەممە رێککەوتنەکە لەلایەن سەرکردایەتی
پارتی و جڤاتی نیشتیمانییەوە پەسەند کران.