شاندێکی بزوتنەوەی گۆڕان سەردانی بزوتنەوەی ئیسلامی دەکات

شاندێکى بزوتنەوەی گۆڕان سەردانی بزوتنەوەی ئیسلامی دەكات و لە کۆبونەوەیەکدا پێشهات و ئاڵنگارییەکان و پێویستى یەکخستنى هەڵوێست و یەکڕیزى لایەنەکان بۆ دورخستنەوەى هەر ئەگەرێکى نەخوازراو و مەترسیەكانی بەردەم قەوارەی هەرێمی كوردستان تاوتوێ دەکەن.

شاندێکی بزوتنەوەی گۆڕان کە پێکهاتبو لە بەختیار عومەر ئەولى رێکخەری ژوری پەیوەندییە سیاسیەکان و ئەندامانی ژوری پەیوەندیە سیاسیەکان، سەردانی بزوتنەوەی ئیسلامی کوردستانى کرد و لەلایەن ئەنوەر عەنەبی و مونیرە عەلی عەبدولعەزیزو مامۆستاعوسمان سەعید  ئەندامانی مەکتەبی سیاسی و سەرکردایەتی بزوتنەوەی ئیسلامی پێشوازیان لێکرا.

لە دیدارێکدا تاوتوێى دواین پێشهاتەکان و ئەو ئاڵنگاریانە کرا  لەبەردەم هەرێمى کوردستان و عێراق و ناوچەکەدان، جەختکرایەوە لەوەى بەیەکڕیزى و یەک هەڵوێستى روبەڕوى ئەو قەیران و مەترسیانە ببنەوە کە مەترسین بۆسەر قەوارەى هەرێم.

لاى خۆیەوە بزوتنەوەی ئیسلامی هاوکات لەگەڵ پشتگیری تێڕوانین و پڕۆژەى بزوتنەوەی گۆڕان بۆ روبەڕوبونەوەى مەترسییەکان، هاو هەڵوێستى خۆیان نیشاندا بۆ چارەسەرکردنی قەیرانەکان.