ناوەڕۆکى کۆبونەوەى گۆڕان و پارتى

21/05/2023


گۆڕان و پارتى بۆ تاوتوێکدنى دۆخى هەرێمى کوردستان و هەڵبژاردنەکان کۆبونەوە و بزوتنەوەى گۆڕان رایدەگەیەنێت: جەختمان کردەوە لەوەى پێویستە لێکترازانەکان زیاتر نەبێت و هەوڵى کۆکردنەوەى بیر و راکان بدەین و هەڵبژاردنێک ئەنجام بدرێت کە پاک و بێگەرد بێت و گفتوگۆکانیشمان بەو ئاڕاستەیە ببەین کە لە خزمەتى خەڵکى کوردستان بێت.

دواى نیوەڕۆى ئەمڕۆ یەکشەممە شاندێکى باڵاى پارتى دیموکراتى کوردستان سەردانى بزوتنەوەى گۆڕانى کرد لە شارى هەولێر و لەلایەن شاندى بزوتنەوەى گۆڕانەوە پێشوازیان لێکرا.

دواتریش لە کۆنگرەیەکى رۆژنامەوانى هاوبەشدا کاردۆ محەمەد، ئەندامى جڤاتى نیشتیمانى بزوتنەوەى گۆڕان لەبارەى ناوەڕۆکى کۆبونەوەکەوە رایگەیاند: گفتوگۆمان سەبارەت بە چەند پرسێک کرد کە پەیوەندییان بە دۆخى ئێستاى هەرێمى کوردستان و ئاڵۆزى و کێشەکانەوە هەیە و هەردولا جەختمان لەوە کردەوە کە پێویستە لێکترازانەکان زیاتر نەبێت و
هەوڵى کۆکردنەوەى بیر و راکان بدەین و هەڵبژاردنێک ئەنجام بدرێت کە پاک و بێگەرد بێت و خزمەتى دیموکراتى و ئاڵوگۆڕ بکات.

وتیشى: هیوادارین بتوانین گفتوگۆکانیشمان بەو ئاڕاستەیە ببەین کە لە خزمەتى خەڵکى کوردستان بێت.

لاى خۆیەوە جەعفەر ئیمینیکى ئەندامى مەکتەبى سیاسى پارتى دیموکراتى کوردستان وتى:
سەردانەکەمان بۆلاى بزوتنەوەى گۆڕان درێژەپێدانى سەردانى شاندى پارتییە بۆ لاى لایەنە سیاسییەکان و دەبێت لایەنە سیاسییەکان هاوبەشبن لە روبەڕوبونەوەى ئاڵنگارییەکانى بەردەم هەرێمى کوردستان.

ئاماژەى بەوەشکرد کە پرسى هەڵبژاردنەکان پرسێکى گەرمى سەردانەکانیان و "بیر و راکان لەبارەیەوە لێکنزیکە،هەموان پەرۆشى ئەوەن هەڵبژاردن لە کاتى خۆى ئەنجامبدرێت ئەوەى ماوە پرسى تەکنیکیە".


هەواڵی زیاتر