فەرمان مەجید: هەنگاوى رژد نەنراوە بۆ قەرەبوکردنەوەى کەسوکارى ئەنفالکراوان

فەرمان مەجید، باژێروانى چەمچەماڵى بزوتنەوەى گۆڕان، رایدەگەیەنێت؛ هەنگاوى رژد نەنراوە بۆ قەرەبوکردنەوەى کەسوکارى ئەنفالکراوان، بۆیە پێویستە هەوڵى جددى بدرێت لەسەر ئاستى حکومى و حزبیى و نێودەوڵەتى بۆ هێنانەوەى تەواوى روفاتى قوربانیانى ئەنفال و قەرەبوکردنەوەى کەسوکاریان.

ئەمڕۆ چوارشەممە (2024/2/21)، شاندێکى بزوتنەوەى گۆڕان بەشدارى کرد لە رێوڕەسمى بەخاکسپاردنى (172) قوربانى ئەنفال لە مۆنۆمێنتى ئەنفال لە چەمچەماڵ بۆ دوپاتکردنەوەى پشتیوانى لە دۆسیەى قوربانیان و وەستان لەگەڵ کەسوکارى قوربانیان و پێداگیرى لە بەدەستهێنانەوەى مافەکانیان.

فەرمان مەجید، باژێروانى چەمچەماڵى بزوتنەوەى گۆڕان رایگەیاند: ئەمڕۆ بە شاندێکى فەرمى بزوتنەوەى گۆڕان و تەواوى ئەنجومەنى قەزاى چەمچەماڵى بزوتنەوەى گۆڕانەوە لێرەین لە حزورى قوربانیان و کەسوکارى ئەنفالکراواندا بۆ رێزگرتن لە رۆحى پاک و قوربانیدانیان.

سەبارەت بە هێنانەوەى تەواوى روفاتى قوربانیان و دۆخى کەسوکارى قوربانیان و بێخزمەتى سنورەکە، باژێروانى چەمچەماڵى بزوتنەوەى گۆڕان وتى: هەنگاوى جدى و پێویست دەبو بنرایە بۆ قەرەبوى رۆحى و دەرونى کەسوکارى ئەنفالکراوان، بەڵام لە ساڵانى رابردودا بە داخەوە ئەو بێباکى و قەیرانانەى هەبون خەڵکیان نیگەران کردوە، بۆیە پێویستە هەوڵى جدرى بدرێت لەسەر ئاستى حکومى و حزبى و نێودەوڵەتى بۆ هێنانەوەى تەواوى روفاتى قوربانیانى ئەنفال و قەرەبوکردنەوەى کەسوکاریان و دابینکردنى خزمەتگوزارییەکان بۆ سنورەکە و چارەسەرى کێشەى کەمئاوى کەموکوڕییەکانى بوارى پەروەردە و تەندورستى و گەشەپێدانى گەشتوگوزار و وەبەرهێنان لە سنورى قەزاى چەمچەماڵ.