هزری سیاسی سیستم و هونەری حکومڕانییەتی لە زنجیرە کۆڕ و سیمینارەكانی ژوری توێژینەوەکانی بزوتنەوەی گۆڕان

لە چوارچێوەی زنجیرە کۆڕ و سیمینارێکدا، ژوری توێژینەوەکانی بزوتنەوەی گۆڕان سیمینارێکی ناساندنی نوێترین کتێبی نوسەر سیروان حەمەڕەشید بە ناونیشانی (هزری سیاسی سیستم و هونەری حکومڕانییەتی) رێکخست.

لە سیمینارەکەدا، کە ژمارەیەکی بەرچاو لە هەڵسوڕاوان لە مەكۆی سەرەكی لە سلێمانی ئامادەی بون، نوسەر ئاماژەی بە ناوەڕۆكی كتێبەكە كرد پەیوەست بە هزری سیاسی و سیستم و هونەری حكومڕانێتی، باسی لە گرنگی فکری سیاسیی کرد لە مێژوی سیاسیی و حوکمڕانیدا.
پەیوەندیدار بە سیستمی حكومڕانی و هەرێمی كوردستان كە بەشێكی كتێبەكەی پێكهێناوە، نوسەر ڕونی كردەوە كە ئەوەی ماوەی سێ دەیەیە لە هەرێمی کوردستان بەناوی حکومڕانی و دەسەڵاتەوە دەگوزەرێت، لەگەڵ بنەما زانستییەکانی حکومڕانی و سیاسەت پێكنایەتەوە ئەوەش بەهۆی بوونی گەندەڵی بێشومار و كەموكوڕی لە سیستمی بەڕیوەبردن و نادادپەوەری.
لە بەشێکی دیکەی سیمینارەکەدا نوسەر بە وردی باسی کتێبە نوێیەکەی کرد و بڕیاریشە لە ئایندەدا لەرێگەی چەند سیمینارێکی دیکەوە لە شار و شارۆچکەکانی کوردستان، کتێبەکە بۆ خوێنەران بخرێتەڕو.
دواتریش دەرگای گفتوگۆ بەڕووی ئامادەبووان کرایەوە و نوسەر بە واژۆی خۆیەوە کتێبەکەی پێشکەشی ئامادەبووان کرد.