ژوری حكومەت ڕێزلێنان پێشكەشی بەڕێوەبەرانی پیشووی هەردوو ناحیەی سەرقەڵا و شۆڕش دەكات

ژوری حكومەتی بزوتنەوەی گۆڕان سوپاس و ڕێزلێنان پێشكەشی هەردوو بەڕێوەبەری پێشووی ناحیەكانی سەرقەڵا و شۆڕش دەكات كە ساڵانی ڕابردو لە پشكی گۆڕان لە ئەرك و بەرپرسیارێتیدا بوون و بە ئەمانەتەوە خزمەتیان كردووە.

ئەمڕۆ شەممە (7ی2ی2026) لە ڕێوڕەسمێكدا كە بە ئامادەبوونی ژمارەیەك لە هەڵسوڕاوان و گۆڕانخوازان و ئەندامانی جڤاتی نیشتمانی لە مەكۆی سەرەكی سازكرا، ژووری حكومەتی بزوتنەوەی گۆڕان سوپاس و پێزانین و ڕێزلێنانی پێشكەشی هەریەك لە تەها ئیبراهیم، بەڕێوەبەری پێشوی ناحیەی سەرقەڵا و هاوتا عەزیز، بەڕیوەبەری پێشوی ناحیەی شۆڕش كرد لەپای ئەو خزمەتەی لە ساڵانی ڕابردوو لە پۆستەكەیاندا پێشكەشی هاوڵاتیانی سنوورەكانیان كردووە.

كاوە عەبدوڵا رێكخەری ژووری حكومەت لە وتەیەكدا ستایشی رۆل و خزمەتی هەردوو بەڕێوەبەری پێشووی ناحیەكانی كرد و وتی: هەردوو بەڕێزان كاك تەها و كاك هاوتا لەو كەسانەن كە لە ئەرك و بەرپرسیارێتیاندا لە پشكی بزوتنەوەی گۆڕان هەموو توانای خۆیان خستەگەڕ بۆ خزمەتی خەڵك و ئەركەكەیان و نمونەی كادیری دڵسۆز و خەمخۆری و بەرپرسیار بوون، كارەكانیان و شاهێدی خەڵك بۆیان كە ماندوونەناسانە لەگەڵ كۆژانەكانیاندا بوون وایكردووە شایستەی ستایش بن و ئەم سوپاس و ڕێزلێنانەش پێزانینە بۆ ئەو خزمەتەی كردویانە.
لای خۆیانەوە هەریەك لە تەها ئیبراهیم و هاوتا عەزیز، لەگەڵ ئەوەی ستایشی پێزانینی ژووری حكومەتیان كرد، هیوایان خواست لەئاست ئەو ئەرك و بەرپرسیارێتی و متمانەیەدا بووبن كە گۆڕان پێی بەخشیون و جەختیان كردەوە كە چۆن بە ئەمانەتەوە كارەكانیان لە حكومەتی خۆجێی بە ئەنجام گەیاندووە و جێبەجێكاری بەرنامەی گۆڕان بوون بۆ حزمەتی خەڵك، بەهەمان گڕوتینەوە بەردەوام دەبن.