ئەڵمانیا؛ گۆڕان پشتیوانیی خۆی بۆ هاوپەیمانییەکی نوێی نەتەوەیی دووپات دەکاتەوە

لە چوارچێوەی هەوڵە بەردەوامەکانی بۆ یەکخستنی گوتاری نەتەوەیی و پشتگیریکردن لە ڕەوه‌ندی کوردی لە دەرەوەی وڵات، شاندێکی بزووتنەوەی گۆڕان بەشدارییان کرد لە کۆنفرانسی دامەزراندنی هاوپەیمانی کۆمەڵگەی مەدەنی کوردی لە شاری دوسلدۆرفی وڵاتی ئەڵمانیا و نوێنەرانی گۆڕان جگە لە پشتیوانی هاوپەیمانێتیەكە دوپاتیان كردەوە هەر هەوڵێك بۆ داكۆكی لە دۆزی گەلی كورد بێت لە ریزی پێشەوە دەبن و داكۆكی لە پرسە نەتەوەیی و نیشتمانیەكان دەكەن.

شاندی بزووتنەوەی گۆڕان كە لە پەری ئەحمەد ئەندامی جڤاتی نیشتمانی و نالی پشدەری ئەندامی دەستەی بەڕێوەبەری ئەنجومەنی ئەڵمانیای بزوتنەوەی گۆڕان پێكهاتبوون لە وتارێکدا كە لە میانی کۆنفرانسەکەدا پێشكەشیانكرد جەختیان كردەوە لە ئامادەیی بۆ هاوکاری بە ئامانجی یەکخستنی گوتاری ڕەوەندی كوردی و گواستنەوەی هەوڵ و چالاكیەكان لە دروشمەوە بۆ کردار.

نوێنەرانی گۆڕان ئاماژەیان بەوە کرد کە یەکڕیزیی نەتەوەیی پێویستی بە هەنگاوی کردەیی و میکانیزمی ڕوون هەیە كە بەرژەوەندییە باڵاکانی گەلی کورد لە سەرووی هەموو ململانێیەکی حزبی و کەسییەوە بێت و بۆئەوەش دروستکردنی هاوپەیمانییەكە هەنگاوێکی گرنگە بۆ ئەوەی دەنگی کورد بە یەکگرتوویی بگاتە ناوەندە بڕیاربەدەستەکانی جیهان لەناویاندا ئەڵمانیا.
هاوكات شاندی بزووتنەوەی گۆڕان و ژووری ڕەوەندی کوردی، ڕەشنووسێکی پێشنیارکراویان بۆ سەرخستنی پڕۆژەکە پێشکەش کرد و ئامادەیی تەواوی بزووتنەوەکەیان بۆ هەر جۆرە پشتیوانی و هەماهەنگییەکی بەردەوام دووپاتکردەوە، لەگەڵ ئەوەشدا لە بەشێکی وتارەکەی گۆڕان گرنگی پاراستنی زمان و کلتوری کوردی وەک بنەمایەکی سەرەکی بۆ یەکێتی نەتەوەیی لە تاراوگەدا ئاماژەی بۆكرا.

‎بزووتنەوەی گۆڕان وەک هێزێکی پێشەنگ لە چاکسازی و کاری نیشتمانی، بەردەوام دەبێت لە پشتگیریکردنی ئەو جۆرە دەسپێشخەرییانەی کە کۆمەڵگەی مەدەنی و ڕێکخراوەیی کورد بەهێز دەکەن و یەکڕیزیی ماڵی کورد دەپارێزن.