هەڵەبجە؛ هەنگاوی كرداریی بۆ خۆڕێكخستنەوە لەگەڵ هەڵسوڕاوان تاوتوێكرا

لە چوارچێوەی راسپاردەی كۆنفڕانسی نیشتمانی و كۆبونەوەكانی جڤاتی نیشتمانی و دەستوری نوێی ناوخۆیی پەسەندكراوی كۆنفڕانس پەیوەست بە هەنگاوەكانی خۆڕێكخستنەوە، ئەمڕۆ شەممە (٨ی٨ی٢٠٢٦) شاندێكی گۆڕان كە پێكهاتبون لە شاخەوان رەئوف بەگ و نەسرین جەمال ئەندامانی ئەنجومەنی سیاسی و كاوە عوسمان ئەندامی جڤاتی نیشتمانی، لە مەكۆی گۆڕان لە هەڵەبجە لەگەڵ سەرپەرشتیاری مەكۆ و ئەندامانی ئەنجومەنی قەزا و دەستەبژێرێك لە هەڵسوڕاوانی سنورەكە كۆبونەوە.

لە كۆبونەوەكەدا، دوایین پێشهات و ئاڵنگارییەكان، باروگوزەران و دۆخی خەڵك و پێویستی بەدەمەوە هاتنی داواكارییەكان تاوتوێكرا و ئاماژە بە هەنگاوە كرداریەكانی ڕیكخستنەوەی ئۆرگانەكان و ئامادەكاری بۆ قۆناغی نوێ كرا.

هاوكات رۆڵ و كاریگەری هەڵسوڕاوان و دەنگدەران و پشتیوانانی بزوتنەوەی گۆڕان لە هەڵەبجە بەرزنرخێندرا كە لە دۆخی سەخت و ماوەكانی ڕابردودا بەو پەڕی توانیانەوە بەردەوام بون لەسەر رێباز و بنەما نەگۆڕەكانی گۆڕان، جەخت لە گرنگی بەردەوامی و كاری پێكەوەیی كرایەوە بەو پێیەی ڕوانگەی گۆڕان، ڕەسەنایەتی لە دەستنەداوە و ئێستاش کارنامەکەی دەتوانێت هاوکار بێت لە چارەسەری بەشێک لە کێشە و قەیرانەکان و خزمەتی خەڵك.

لە ئێستادا بزوتنەوەی گۆڕان سەرجەم ئاست و ئۆرگانەكان لەژیر راسپاردەی كۆنفڕانسی نیشتمانیدا سەرقاڵی خۆڕێكخستنەوە و هەنگاوی كرداریی و ئامادەكاریە بۆ قۆناغی نوێ بەشێوەیەك كە لە ئاست چاوەڕوانی گۆڕانخوازان و تەواوی هەڵسوڕاوان و خەڵكدا بێت.